Nongstoiñ, Jymmang:
Ka jingrah noh ïa ki tiar ki tar jingdonkam kaba la mang na ka bynta ka Maternity & Child Hospital (MCH) kaba don hapoh ka shnong Upper New Nongstoiñ, West Khasi Hills District, bad pynkynriah noh sha kiwei pat ki hospital kiba don ha kiwei pat ki District, ka la pynlong ïa ka Khasi Students’ Union (KSU) West Khasi Hills ba kan mih shakhmat ban pynpaw ïa ka jingsngewkhia kaba jur.
Lah ban kdew ba ïa ka MCH Hospital ha Nongstoiñ la lah ban pyndep ïa ka jingtei la kumba 3 snem eiei kaba kiba bun ruh ki paidbah nongshong shnong ki la ap khmih lynti ban ïoh plie paidbah noh ïa katei ka hospital. Katkum ka jinglum jingtip ha u snem 2022, ka tnat ka koit ka khiah ka la mang pisa ban thied ïa ki tiar ba donkam ha katei ka hospital, hynrei ha ka 23 tarik u Jymmang 2023, ar tylli ki trok ki la wan ïeng ha katei ka hospital ban sei noh ïa ki tiar ki tar na bynta ban pynkit noh sha ka Civil Hospital ha Mawkyrwat.
Halor kane, ka KSU WKH ha ka jingïalam u samla Franklin Syiemïong, General Secretary ha ka sngi Nyngkong ka la leit sha ka shlem treikam DMHO da ka jingthmu ban ïakren bad ban pan jingshai halor katei ka bynta, hynrei namar ka jingbym don jong ka DMHO, ki nongkitkam ka KSU hadien ba la wad jingtip, la pyntikna ba ïa kitei ki tiar na ka MCH Hospital Nongstoiñ la dep ban kit.
Ha kane ka sngi ka KSU ka la leit ruh ban jurip ïa ka MCH Hospital Nongstoiñ bad haba kren ha ki lad pathai khubor, u samla Franklin Syiemïong u la ong ba ha ka jingshisha haba la ïoh ïa katei ka hospital ki paidbah ki la sngewkmen ha ki snem ba la lah, hynrei mynta haba ïoh ïa ka khubor ba ïa ki tiar ba la mang na ka bynta kane ka MCH la rah noh shawei. Kumta ka KSU ka pynpaw ïa ka jingpyrshah bad kam sngew ïahap satia.
Namar kata, ka dawa ïa ka sorkar ba kan pynkloi noh ban wanrah noh ïa ki tiar kumba ma ki, ki la kular ha kane ka MCH bad ha kajuh ka por ban plie noh ïa kane ka hospital khnang ba kan long ka jingmyntoi.
