Shillong, Jymmang 30:
Ka Rangdajied United ka la lah ban pyntikna ban jam sha ka semi final ha ka lympung ïalehkai Meghalaya State League 2023 hadien ba ka la lah ban pynliem noh ïa ka Mulait United da 5-0 kol ha ka jingïalehkai jong ka Group-B kaba la long ha ka Sngi Ba-ar ha Kiang Nangbah Stadium kaba ha Jowai.
Lyngba kane ka nam jop ka Rangdajied ka la kamai 13 point na ka bynta ban lamkhmat ha kane ka group bad tam ruh da lai point ïa ka Ladthadlaboh.
Ha ka jingshisha ka Ladthadlaboh ka la don jingkyrmen ban bat ïa ka kyrdan ba hakhlieh, hynrei namar ka jingshah rem ha ka Niaw Wasa United ka la pynlong ban hiar noh sha ka kyrdan ba-ar.
U Wansiewdor Nengnong (21′, 90’+3) bad u Knerktilang Buam (58′, 63′) ki la ïoh ban thep mar ar kol, katba ïa ka shi kol la thep da u Basuklang Bina (45’+2).
U Bansanbha Khongsdam u la long u rangïalehkai uba kynsai na ka bynta ban ïoh pynkhih jar nyngkong lyngba u Wansiewdor, uba la ïoh ban pyndei da ka khlieh.
Kham ha shwa u Romarius Laban u la ïoh ïa ka kabu kaba biang bha, hynrei u rangapkol ka Rangdajied u Banshanlang Sten u la lah ban pyllait na ka jingshah thep ha ka free-kick.
Ïa ka kol kaba ar la thep shwa ban kut ka jingïalehkai jong ka kylla step lyngba u Basuklang hadien ka jingïarap pynbuh bol da u Knerktilang na ka bynta ban tam 2-0 kol.
Kham ha shwa jong kane ka lympung ïalehkai, ka Mulait bad ka Niaw Wasa United ki la long ki ar tylli ki kynhun kiba don jingkyrmen ban jam shakhmat, hynrei na ka daw ka jingtlot ha ka bynta kaba shadien ka la pynlong ïa ka Rangdajied ban jam shaphrang ha kane ka lympung.
Hadien ba la bteng biang ïa ka jingïakhun, ka Rangdajied ka la ïai bteng ban thep ïa ka kol kaba lai lyngba u Knerktilang ha ka minit kaba 58. Une u rangïalehkai shakhmat u la pynbud biang ïa ka kol kaba ar ha ka minit kaba 63.
Ha shwa ban kut ka jingïalehkai u Wansiewdor u la thep biang sa shi kol ha ka minit kaba 90’+3.
U Lessius Sujai u la shah sei da ka red card na ka daw ba u la ïohpdiang ïa ar tylli ki yellow card hadien ba u la pynur ïa u Wansiewdor hapoh ‘box’. Pynban u Buam u la pynlehnohei ïa ka kabu ksiar kaba u la shut ïa ka free-kick, hynrei kane ka kynhun ha kaba kut ka la khur ïa ka jingjop.
Wat la ka la tikna ban rung sha ka semi final, hynrei ka Rangdajied ka dangsah sa kawei ka jingïakhun pyrshah ïa ka Youth Club Pdengkarong ha ka 3 tarik u Jylliew, katba ka Mulait United FC ïa ka Rymbai Iawpynsing ha ka 1 tarik.
