New Delhi, Jymmang:
Katkum ka khubor ba lah pynmih ha kaba iadei bad ka thup kyrdan ba thymmai jong ka jingialehkai Badminton ia kaba la tip kum ka BWF Rankings, ka khubor ka iathuh ba ki khlur ialehkai ka ri ha ka jingiakhun ba mar arngut jong ki shynrang; kata u Satwiksairaj Rankireddy & Chirag Shetty, ki lah kynjoh mynta sha ka kyrdan kaba biang tam eh ha ka pyrthei ha kaba kitei ki arngut ki lah ioh ban rung ha ka kyrdan ba 4 ha ka pyrthei lyngba katei ka thup ba thymmai.
Shuh shuh ruh ka khubor ka iathuh ba u Satwik-Chirag kiba ju iai treilang ryngkat-ryngkat ha man la ki lympung ialehkai, ki la lah ruh ha ka ban khur shalade ia ka takma Ksiar na ka lympung Commonwealth Games bad kumjuh ruh ia ka khet jingjop na ka French Open Super 750 ha u snem ba lah dep bad ym tang katta, hynrei kiba la lah ruh ban khur ia ka jingjop shalade na ka Swiss Open Super 300 jong ka aiom ialehkai kaba mynta. Kumta na kitei ki jingkhur jingjop ki jong ki, kitei ki arngut ki kit mynta ia ki 74,651 dor-thong na ki 12 tylli ki lympung ialehkai ba ki lah ioh ban shimbynta.
Da kaba khur ia ka jngjop ba thymmai kata ka jingjop kaba lai na ka lympung ialehkai kaba dang shu dep long ha ka taiew ba lah dep ka Malaysia Masters, ka khubor ka iathuh ruh ba uwei na ki khlur ialehkai ka ri u HS Prannoy mynta ka sien u lah ioh ban kiew da shi jak ana ka bynta ban khur biang shalade ia ka kyrdan ba 8 ha katei ka thup kyrdan ba thymmai na ka jingiakhun paramarwei katba u Kidambi Srikanth pat u lah khur ia ki lai jaka na ka bynta ban ioh biang shalade ia ka jaka ha ka thup ba 20 ha kaba mynta u shong ha ka kyrdan ba 20 ha ka thup.
Katba uwei pat u khlur ialehkai ka ri u Lakshya Sen, u lah shah pynhiar jaka noh sha ka kyrdan ba 23 ha ka pyrthei hadien ka jingshah pynkut noh ka jngiaid lynti ka jong u ha ka pork aba kloi-lan ha ka Malaysia Masters.
Haba phai sha ka thup kyrdan jong ki kynthei ha ka jingiakhun paramarwei, ka PV Sindhu ka dang iaisah biang ha kajuh ka kyrdan kata ha ka jak aba 13 katba ka Treesa Jolly & Gayatri Gopichand ruh ki lah iaisah biang mynta ha ka kyrdan ba 15 na ka kyrdan jong ki kynthei ha ka jingiakhun ba mar arngut.
