Nongstoiñ, Jymmang 30:
Ki kynhun seng na West Khasi Hills District ba kynthup ïa ka Hynñiewtrep Achick National Movement, Meghalaya Youth Federation, West Khasi Hills Student Union, Western Youth Federation bad UHM ki la ai por shi taïew ïa ka Sorkar Jylla lyngba ka tnat ba dei peit ban ai ka jingpynshai halor ki tiar ba la rah noh na ka MCH Hospital Nongstoiñ.
Ki nongkitkam jong kitei ki seng bapher bapher ki la ong ba hadien ka jingmih ïohi halor ka jingrah jubor noh ïa ki tiar ki tar jong ka MCH Hospital Nongstoiñ sha Mawkyrwat ki la leit ban jurip hi dalade ha kaba ki la lap ïa ka jingshisha ba ki tiar baroh kiba la mang ha katei ka jaka sumar kim shym don satia.
Nalor kata, ki la ther tyngeh ïa ka sorkar bad ïa ka Myntri ka tnat ka koit ka khiah da kaba ong ruh ba ka sorkar kam dei ban leh politik bad ka koit ka khiah ki paidbah.
Namar kata, ki la dawa ba hapoh shi taïew ban ai ka jingpynshai halor katei ka bynta, lym kumta kim banse ban shim da kiwei pat ki sienjam.
