Kamalanagar, Jymmang:
U Kali Kumar Tongchangya, MDC u ba dei u kyrtong ba marwei ban ïakhun na ka bynta ka shuki Chairman jong ka CADC u la shah jied khlem kano kano ka jingpyrshah ban shimti ïa katei ka kam. Ïa u Kali Kumar la pynkhamti ïa ka shuki chairman da u Hiranand Tongchangya – Protem Chairman jong ka jingïalang ba nyngkong jong ka Chakma Autonomous District Council kaba la pynlong ha ka taiew ba la dep ha CADC Session Hall.
U Kali Kumar Tongchangya u la shah jied ban long u nongmihkhmat na ka thaiñ Fultuli MDC Constituency kum u kyrtong jong ka seng MNF.
Kat kum ki jingïoh lum jingtip la ïathuh ba u Kali u la ïoh ban shimti ïa ka kam chairman jong ka CADC ha ka sien kaba lai. U la long ruh u MDC jong ka CADC ha ka sien kaba hynriew.
Ha ka jingïalang jong ka CADC, la pynlong ruh ïa ka jingsngap jar kaba shipor kum ka dak ban kynmaw burom ïa ki 3 ngut ki MDC barim kiba la khlad noh shiteng por. Ki 3 ngut ki MDC ki kynthup ïa u Mohesh Boran Chakma bad u Charan Singh Chakma kiba la khlad ha ka jingjia kylla kali ha ka por ba ki dang thmu ban leit sha Aizawl, bad u Amit Kumar Chakma u ba la khlad noh hadien ka jingshah thombor ha ki runar ha ka por ba u dang leit ban ïashim bynta ha kawei ka rynsan ïalap ilekshon.
