New Delhi, Jymmang:
Ka Chinese Embassy and Consulates General ka la dep ban ai da palat 60,000 tylli ki Visa sha ki nong India kiba leit jingleit sha China ha ki san bnai ba la leit jong une u snem ba mynta, la ïathuh ka Chinese Embassy ha u nongaiktien sha India u Wang Xiaojian lyngba ka Twitter.
Ïa ki Visa sha ki nong India la ai na ka bynta kiba bun ki jingthmu, kynthup ha kaba ïadei bad ki kam jngohkai pyrthei, ki jingkhmih bniah halor ki kam khaïi, ki jingtrei bad ki jingleit ïakynduh bahaïing.
U Wang Xiaojian ha ka jingphah jingthoh lyngba ka Twitter u la ong, “Ha ki san bnai ba la leit jong une u snem, ka Chinese Embassy and Consulates General ka la dep ban ai da palat 60000 tylli ki Visa sha ki nong India kiba dei ban leit jingleit sha China na ka bynta kiba bun ki jingthmu, kum ha ka jingleit pule, ki kam jngohkai pyrthei, ki kam khaïi, ki jingleit ïakynduh bahaïing bad kiwei pat.”
Ha kaba sdang jong u Lber, ka China ka la dep ban pynbna ba kan sa ai jingbit ban rung na ka bynta ki nongjngohkai pyrthei sha ka ri, kynthup ïa kiba na India ha ka sien kaba nyngkong ha ki lai snem.
Ha ka jingthoh ba la phah, kaba la long ha ka 14 tarik, Lber, ka Chinese Embassy and Consulates General ha India ka la ong ba kan sa sdang ban pynmih shuh shuh ïa kiba bun rukom ki Visa jong ka China. Ha ka jingthoh ba la phah, la ong ba ka Chinese Embassy ha India ka la ong, “Ki Visa jong ka China ïa kiba la pynmih hashwa ka 28 tarik, Lber, 2020 ki dang treikam bad nangne yn sa nang pynthymmai bad pyntreikam shuh shuh.”
Ka la ong shuh shuh ba ka Chinese Embassy and Consulates General ha India kan sa sdang ban pynmih ïa kiba bun rukom ki Visa jong ka China.
