Shillong, Jymmang 31:
Ka Meghalaya State Olympic Association (MSOA) kan rakhe ïa ka Olympic Day da kaba kan pynlong ïa ka jingïakob mareh ba la tip kum ka “4th Shillong 10k run” ha ka 24 tarik mynta u Jylliew ha kane ka nongbah.
Kane ka jingïakob kan long na ka bynta ki shynrang bad kynthei kiba la 18 snem shaneng bad kiba 50 snem shaneng ki donkam ban pyni ïa ki syrnod ban pynshisha ïa ka snem kha.
Ki lynti ban mareh kin long kumjuh kumba long ha u snem ba la dep bad la pynkhreh ruh ïa ki khusnam na ka bynta ki nongjop. Ka jingpynrung ïa ki kyrteng ki nongïashim bynta kan long ha ka shlem treikam ka MSOA ha JN Stadium naduh 1 baje haduh 6 baje bad ka tarik ba khatduh kan long ha ka 20 tarik.
Na ka bynta ki jingtip ba kham bniah ki nongïashim bynta ki lah ban ïakynduh ïa u Bah John Kharshiing, Bah Ksan Warjri. Ki lah ruh ban thep kyrteng da ka online lyngba ka https://meghalayaolympicassociation.com/olympic-day-run bad kane kan treikam naduh 31 tarik u Jymmang.
