Shillong, Jymmang 31:
Ka United Democratic Party (UDP) bad ka Hill State Peoples Democratic People (HSPDP) ki la pynpaw sha ka komiti ba dei ban wanrah noh da ka ‘Office Memorandum’ kaba thymmai khnang ba ka jingthung kam thymmai kan ïoh ban sdang noh.
Haba kren sha ki lad pathai khubor, ki nongïalam ka UDP bad HSPDP kiba la ïakynduh lang ha ka miet sngi Balang, ki la ong ba ka jingkwah ban wanrah noh da ka Office Memorandum ba thymmai ka long namar kane kaba mynta ka dei ba hap ban pyntreikam naduh u snem 1972.
Ki dkhot jong ka komiti ba la thung kyrpang da ka sorkar ban ïakren halor ka roster system bad ka reservation policy kiba dei na ka seng UDP bad HSPDP, ki la pynpaw ka jingsngewnguh ïa ka sorkar kaba la sngap ïa ka jingai jingmut jong ki.
U President ka HSPDP u Bah KP Pangniang u la ong, kum ka seng baroh ar (HSPDP bad UDP) kin shim ka jingkitkhlieh ba dei ban review ne peit bniah biang ïa ka reservation policy.
U la ong ruh ba kumba ka long, ki la dep ban pynpaw hakhmat ka komiti ba la dei ban wanrah noh kham kloi ïa ka Office Memorandum ba thymmai khnang ba ka jingthung kam kan treikam nangne shakhmat ym shuh katkum ka Office Memorandum kaba la pynmih ha ka 10 tarik Jymmang 2022 kaba treikam naduh u snem 1972.
U Bah Renikton L Tongkhar ka UDP u la ong kumba ki la dep ban buh ha ki ‘Manifesto’ jong ka ilekshon MLA ba la dep, kata ban peit bniah biang ïa ka Reservation Policy, kumta hi ki la ïaid shakhmat ba donkam ban peit bad bishar bniah biang ïa kane ka policy.
“Kumba la dep ban bthah da ka komiti, ngin sa phah da ka jingthoh halor ki jingai jingmut ki jong ngi ba la buh hakhmat bad ruh halor ka jingdonkam ban tyrwa ban thaw noh da ka expert committee,” la ong u Bah Renik.
Haba ïadei bad ka reservation policy ki la ïakren bad pynpaw la kijong kijong ki jingsngew bad ha na ka liang ka seng kin sa phah da ka jingthoh sha ka komiti halor ki jingai jingmut jong ki.
