Halifax, Jymmang:
Katkum ki khubor la ong ba ka jingpluh ki khlaw ha ka phang Mihngi ka nongbah Halifax jong ka Canada, ka la pynlong ia ki bor pyniaid ka Canada ba kin pynkynriah shnong noh ia ki hajar tylli ki longiing jong katei ka nongbah, ha kaba ki bor pyniaid ki la mana ruh ia ki nongshong shnong katei ka nongbah ba kim bit ban leit phai biang sha katei ka jaka tad haduh ba kin da ioh ia ka jingpynbna na ka sorkar Canada ha ki sngi ki ban wan.
U heh ka Halifax, u la iathuh ba ki don palat 18,000 ngut ki paidbah nongshong shnong kiba la hap ban phet shnong noh namar jong katei ka jingjia.
Ia katei ka jing pynkynriah la sdang naduh ka Sngi U Blei, kaba kynthup ia ki thaiñ ka Hammonds Plains, Upper Tantallon bad ka Pockwock. Kitei ki shnong ki long ki shnong ba kham bun paid nongshong shnong bad kumba 15 mile na Falifax. La ong ruh ba wat da ki para marjan shnong jong kitei ki shnong, ki la shu dap da ka jingsyier haba ki thiah mynmiet namar ka jingbym shngaiñ jong katei ka jingkem ding ki khlaw.
U Myntri Rangbah-duh ka Canada, u Justin Trudeau ha ka Sngi Nyngkong u la pynbna ba ka jingpluh ki khlaw ha katei ka nongbah ka long kaba ap jingma haduh katta ia ki paidbah nongshong shnong khamtam jong ka phang Mihngi katei ka nongbah bad kumta ruh u la ong ba ka sorkar jong u ka la pynkhreh ia ki lad jingiarap naka bynta kito kiba shah ktah ha katei ka bynta.
Kumjuh ruh u heh ka Regional Fire and Emergency na Halifax, u Dave Meldrum haba iakren bad ki lad pathai khubor ha ka Sngi Nyngkong u la iathuh ba tad haduh jong ka miet Sngi Nyngkong ruh ym pat lah ban tehlakam ia katei ka ding khamtam ha ki bynta jong ka Tantallon bad Hammonds Plains bad ki bor pyniaid ki dang ialeh ruh ban wad ia ka daw jong katei ka jingpluh. Kumta ia ki jingtip ba bniah halor ka jingdon kiba mynsaw ne khlad, yn sa lah ban pyntip hadien ynda la ioh ia ka kaiphod bad ynda la ioh ban wad bniah bha.
U Meldrum u la iathuh ruh ba palat 100 ngut ki briew jong ka tnat pynlip ding ki la leit sha kitei ki shnong naka bynta ban iakhun bad ban pynlip ia katei ka ding kaba klang. Hynrei katei ka jingpluh kam long kaba suk ban tehlakam bad kumta ka lah ban shim por bun sngi.
Ki bor pyniaid katei ka nongbah ki la pynbna ‘Emergency’ naduh ka Sngi U Blei hadien ba kiba bun bynta jong katei ka nongbah ki la hap ban shong khlem bor ding namar katei ka jingpluh bad bun ruh ki paidbah nongshong shnong kiba la kynriah shnong noh naduh katei hi ka sngi.
La ong ruh ba katei ka ding ka la nang jur bad ioh lad ban pur heh namar ka jingdon jong ka lyer kaba jur bad kumjuh ruh ki dieng kiba la pyut bad kiba la iap ha katei ka khlaw, ha kaba da ki phew tylli ruh ki iingbriew ki la julor bad ingkhong lut. Namarkata ki bor pyniaid ki la bthah ia ki paidbah ba kin ym pat leit sha kitei ki thaiñ hapoh jong ki 7 sngi eiei, katba ki bor pyniaid kim pat ai jingbit ne ai jingtip ia ki paidbah ba ki lah ban leit phai noh sha ki shnong jongki.
