Shillong, Jymmang 31:
Mynta ka sngi ka 31 tarik Jymmang, 2023 ka dei ka sngi jong ka jingdap san snem kynthih jong ka jingïakhih kaba shyrkhei, bad kaba la pynsdang biang ïa ka jingdawa ban kynriah ïa kiba shong ba sah ha Them Ïew Mawlong lane Punjabi Lane.
San snem mynshwa, ka jingshah shoh ki saw ngut ki samla Khasi kiba bud ïa ki bos saw (JNNURM) ka la pynkhih bitar hi puk ïa ki paidbah kat haduh ba ka Motphran ka la kylla long kum ka madan thma ha kaba na ka liang pulit ki la hap ban bom da ki lathi bad siat da ki tyndong lyer pynsat khmat ïa ki paidbah kiba thmu ban leit hiar thma sha Them Ïew Mawlong.
Ha kato ka sngi, kata, ka 31 tarik Jymmang, 2018, ka jingïakynad ka la sdang naduh ka 5.30 janmiet ha kaba ki paidbah kiba thmu ban leit tur sha jaka sah ki Khar Metor ki la poi tang hakhmat ka Petrol Pump naba ki la shah pakhang noh ha ki pulit.
Hynrei katba nang kham miet ka jingïakynad ka la nang jur ha kaba ki paidbah ki la nang poi na ki bynta bapher bapher jong kane ka nongbah. Wat haduh ka por, 1.30 mynstep, ka jingïalum briew ha ki jaka kiba don markhap bad ka Motphran ka la ïai bteng bad wat hadien ba ki pulit ki la siat da ki phew tylli ki kuli pynsat khmat ban pynpra ïa ki paidbah.
Wat hadien ba ki bor distrik ki la nang pynjur ïa ki pulit pahara, ki paidbah kim shym la kynran dien satia hynrei ki la ïai bteng ïa ka jingthmu jong ki ban leit tur sha Them Ïew Mawlong.
Namar ka jingkhang lad jong ki pulit, la sdang sa ka jingkawang maw jong ki paidbah ïa ki pulit bad kane ka la poi sha ka jingmynsaw jong ki katto katne ngut ki briew kiba ïaid lynti bad kiba ïa lum lang ha ka thaiñ Motphran.
Ha kane ka jingïaleh mar kylliang ki maw ki la wan na ki thaiñ Ïewduh, Stand Jeep bad kham jur palat na ki thaiñ Mawkhar.
Wat la ki pulit ki la siat da ki kuli pynsat khmat, na ka liang ki paidbah kim shym la khih namar ki ïeng ha jaka ba kyndong na Mawkhar kawei na ki thaiñ ïingmane Presbyterian Mawkhar bad kawei ka kynhun ka ïeng na ki thaiñ YMCA.
Kane ka la long ka jingsdang jong ka jingïakynad kaba jur kaba la neh katto katne sngi. Na kane ka jingïakhih, la sdang biang ka jingdawa ban pynkynriah ïa kiba shong ba sah ha Them Metor. Ha ki sngi jong ka jingïakhih, ka la don ka jingpynjari da ka korphiw bad ka jingkhang ïa ka Mobile Internet ban tem ïa ka ding kaba klang. Ki jaka kiba la shah ktah bha na ka jingïakhih ki long ka Mawkhar, Umsohsun, bad Motphran.
Ka sorkar ka la thaw da kata ka High Level Committee ban ïakren halor kane ka mat bad ki la don da ki phew tylli ki jingïalang naduh u snem 2018 haduh mynta. Kato ka jingïakhih ka la neh katto katne sngi hashwa ba ka jingjai-jai kan wanphai.
