Shillong, Jymmang 31:
Ka Shillong Lajong FC kaba dei ka lahduh jong ki saw snem ba la dep ka la jam sha ka kyrdan ba hakhlieh ha ka Meghalaya State League 2023. Kane ka wan hadien ba ka ïai bteng ban khur ïa ka jingjop balai da kaba pynliem noh ïa ka Mawten da 5-1 kol ha ka Sngi Balang ha madan MDSA kaba ha Mawkyrwat.
Ha kane ka jingïalehkai u Babysunday Marngar bad u Hardi Cliff Nongbri ki la ïoh thep mar ar kol, katba ïa ka shi kol la pynbud da u Hamedamanbha Wahlang. Da kane ka jingjop ka la pynlong ïa kane ka kynhun ban lamkhmat ha ka Group-C da kaba kamai 9 dor-thong (point) bad kumjuh ruh ban knieh noh ïa ka kyrdan banyngkong na ka Seven United (8 point).
Tang mar ïasdang ka jingïalehkai, u Babysunday Marngar u la pynkhih jar nyngkong eh ha ka minit kaba ar, hynrei ka Mawten ka la lah ban pynïakhaid kylla ha ka minit kaba 21 lyngba u Oversharp Ïawphniaw.
Hadien katto katne minit, ka Lajong ka la pynbud biang ïa ka kol ba ar lyngba u Hamedamanbha Wahlang ha ka minit kaba 27. Hadien shiteng kynta u Babysunday u la pynbud biang ïa ka kol ba ar ka jong u ha ka minit kaba 37 na ka bynta ban tam da 3-1 kol ha ka kylla step.
Hadien ba la bteng biang ïa ka jingïakhun jong ka kylla miet, ka Lajong ka la ïoh ban thep kol biang lyngba u Hardy Cliff Nongbri ha ka minit kaba 76. Wat la ka Mawten ka la pyrshang ban ïakhun tyngeh, hynrei kam shym la lah ban pynurlong bad ka la shah thep biang sa shi kol shwa ban wai lyngba u Hardy ha ka minit kaba 90’+2 na ka bynta ban pynlong ïa ka Lajong ban khur syndon ïa ka jingjop.
Haba phai sha kawei pat ka jingïakhun jong ka Group-B kaba la long ha Kiang Nangbah Stadium kaba ha Jowai, ka kynhun kaba don shatrai ka Sein Pynbhalang and Youth Club ka la mad biang ïa ka jingshah rem kaba ar hadien ba ka la shah pynliem noh ha ka Pdengkarong da 4-1 kol.
U Wanbor Langshiang u la ïoh ban thep ar kol ha ka minit kaba 4 bad 40. Kumjuh u paralok ba ïalehkai lang u Kindness Mukhim u la thep ar kol ha ka minit kaba 17 bad 77. Katba u Paiabanteiskhem Bhoi (33′) u la lah ban pynphai kylla shi kol na ka bynta ka Sein Pynbhalang.
