Nepal, Jymmang:
Katkum ki khubor la ong ba ki bor pyniaid ki la lap ia ka met jong uwei u nongkiew lum uba dei u nong Germany bad ia ka met jong u la lap hi na Kanchenjunga, uba long u lum ba wan ba lai napdeng ki lum kiba jrong tam ha ka pyrthei. Ia utei u nong Germany la tip kum u Luis Stitzinger.
Ka kynhun ki 5 ngut ki nong Nepali, ha ka Sngi Ba-ar ka la lap ia ka met u Stitzinger na ki bynta ba sha trai jong utei u lum kumba 8,400 metre lane 27,600 phut ka jing jrong jong utei u lum.
La ong ba utei u nongkiew lum uba la don 54 snem ka rta, u la poi shaduh 8,586 metre ka jingjngai kaba u la kiew shitom shajrong utei u lum Himalaya ha ka 25 tarik jong u Jymmang, khlem ka tyndong lyer ‘Oxygen’.
Watla ki bor pyniaid bad ki kynhun iarap ki la ialeh ban wad ia u naduh kitei ki sngi jong ka taiew ba la leit, hynrei namar ka jingthud jong ka suiñ bneng, ka la wanrah jingeh ia ki bad kim shym la lah ban shem ia u ha ka por kaba biang.
Utei u nongkiew lum uba la tbit bad shemphang bha bad uba la ju kiew lum la bun sien, ha ki por ba la leit u la dep kiew teng ia kiwei ruh ki lum ha ka jing jrong kaba palat ia ka 8,000 metre.
Ka Nepal ka long ka ri kaba don ia 10 tylli ki lum kiba jrong tam ha ka pyrthei bad kumta ruh kiba bun ki nongkiew lum bad ki riew shangkai pyrthei, ki ju sngewtynnad ban leit jngoh kai bad ban leit kiew ia kitei ki lum kiba ka pyrthei baroh kawei ka ju tip bad ithuh bha.
Ki don da ki hajar ngut ki nongleit jngoh kai bad ki nongkiew lum kiba la leit sha Nepal ha kane ka aïom, kynthup ia 44 ngut kiba leit sha Kanchenjunga bad da ki spah ngut ruh kiba la dep ban kiew ia utei u lum ha kane ka aïom.
Katba, 12 ngut pat ki dei kiba la khlad noh bad 5 ngut kiba dang jah rngai haduh kane ka kynti naduh ka por ba ki leit kiew sha u lum Everest ha une u snem 2023.
