Shillong, Jymmang:
U Member of Parliament jong ka German Christian Democratic Union (CDU) – Florian Müller kum shi bynta na ka jingwan jngoh jong u ïa ka jylla Meghalaya na ka bynta san sngi, ha ka sngi Ba-ar mynta ka taiew u la leit ban jngoh ïa ka North Eastern Space Applications Centre (NESAC) kaba don ha ka shnong Nongsder, Umiam-Umroi, Ri Bhoi District.
Ïa u Müller la pdiang burom da u Director jong ka NESAC – Dr. S. P. Aggarwal, u ba la ïalam ruh ban pyni ïa ki jingdon jingem ha ki bynta bapher bapher jong ka NESAC Campus. Hadien katei, la pynlong ruh ïa ka jingïalang bad ki ‘scientist’ jong ka NESAC.
Ha ka jingïalang, na ka liang ki ‘scientist’ ki la ïakren ïasyllok halor ki mat kiba ïadei bad ka ‘Disaster Management Support’, ‘Flood Early Warning Systems’ (FLEWS), ‘Forest Fire Monitoring’, ‘Landslides’ bad ha ka liang ka ‘Thunderstorm Nowcasting’ ha NESAC.
Ha u snem 2009, ka NESAC ka la lah ban pynsdang ïa ka ‘Flood Early Warning System’ na ka bynta ka jylla Assam na ka bynta ka thaiñ Lakhimpur. Tad haduh kane ka kynti kaba mynta, ïa ka FLEWS la pyntreikam ha baroh ki distrik jong ka jylla Assam. Lyngba ka jinglah ban pyntreikam ïa ka FLEWS, ka NESAC ka la lah ruh ban phah ïa ki jingmana lyngba ki SMS, ki ’email’ sha ki paidbah nongshong shong.
Ha ka jingïalang, na ka liang u MP u la ai ïa ka jingïaroh kaba khraw ïa ka kynhun jong ka NEDAC kaba la lah ban shim ïa ki lad ki lynti kiba kyrpang na ka bynta ban pynbiang ïa ki lad jingïarap ïa ki ‘riew paidbah ban ïakhun pyrshah ïa ki jingjia shah lynshop mariang.
Ha ka jingïalang, na ka liang ka kynhun ki ‘scientist’ jong ka NESAC ki la ïasyllok ruh halor ki mat kiba ïadei bad ka ‘Remote Sensing’, GIS bad ‘Geosciences’. Ki la pynlong ruh ïa ka jingïasyllok halor ki mat kiba ïadei bad ka ‘Satellite Communication Applications’, kaba dei kawei na ki lad treikam kaba la pyntreikam ha ka thaiñ shatei lam mihngi jong ka ri India ban pynbiang ïa ki lad jingïarap halor ki mat kiba ïadei bad ka koit ka khiah, ka pule puthi, ka roi ka par bad ka bha ka miat na ka bynta ka imlang sahlang.
Hadien ka jingïalang, la pynlong ruh ïa ka kylla kaba kyrpang ha kaba ka la don ka jingïakylli jingkylli bad jingai jubab hapdeng u MP bad ka kynhun ki ‘scientist’.
