Imphal, Jymmang:
Ha ka sngi kaba ar jong ka jingleit jngoh ïa ka jylla Manipur, u Myntri Sorkar Pdeng ba dei khmih ïa ki tnat Kam Pohïing bad Cooperation, u Amit Shah u la pynlong ïa ka jingïalang bad ki kynhun ka imlang sahlang, ki ‘riew pawkhmat, ki ‘riew shemphang, ki ophisar shipai ba la shongthait bad ki ophisar ha Imphal. U la ïakynduh ïa ka kynhun jong ki nongïalam longkmie (Meira Paibi) ha Imphal. Da kaba ban jur halor ka bynta jong ki longkmie ha ka imlang sahlang ha Manipur, ong u Amit Shah ba lyngba ka jingïatreilang, ngi ïeng skhem na ka bynta ka jingpynthikna ïa ka shongsuk shongsaiñ bad ka jingriewspah ha ka jylla.
U Myntri ka tnat Kam Pohiing u la ïakynduh ruh ïa ki kynhun ha ka imlang sahlang kum ka COCOMI, AMUCO, AMOCOC, MMW, STDCM, FOCS, Forum for Restoration of Peace bad ki kynhun jong ki samla pule.
Ki kynhun ki la ong ba ki ïeng skhem na ka bynta ka shongsuk shongsaiñ bad ki la kular ba kin shim ïa la ka bynta ban wanrah biang ïa ka jinglong jai jai ha Manipur. Shuwa ba un leit sha Churachandpur, u Myntri u la ïakren bad ki ‘riew pawkhmat, ki ‘riew shemphang, ki ophisar ka kynhun shipai ba la shongthait bad ruh ki ophisar.
Kine ki kynhun ki la kyntu ïa u Myntri ba kin don ki sienjam ban wanrah biang ïa ka shongsuk shongsaiñ bad ka jing jai jai ha ka jylla.
U Myntri ka tnat Kam Pohïing u la leit ruh sha ka thaiñ Churachandpur bad ïakynduh ïa ki ‘riew pawkhmat bad ka kynhun jong ki kynhun ha ka imlang sahlang. Ha ka janmiet, la pynlong ïa ka jingïalang bad baroh ki kynhun ha nongbah Imphal. U Myntri Kam Pohïing u la peit ïa ka jinglong ka jingshngaiñ bad ki ophisar ka kynhun pulit ka Manipur, ki kynhun CAPF bad ka kynhun shipai jong ka India. U la ong ruh ba ka shongsuk shongsaiñ bad ka jingriewspah jong ka Manipur ka dei ka kam kaba kongsan ïa ngi, bad u la hukum ia ki ophisar ban leh da kaba tyngeh ïa kano kano ka kam kaba pynthut ïa ka shongsuk shongsaiñ.
La ïoh jingtip ruh ba na ka liang u amit shah hynnin ka sngi u la leit ban jngoh ruh ïa ka thaiñ Moreh bad Kangpokpi jong ka jylla Manipur bad ha katei ka sngi u la leit ban pynlong ïa ki jingïalang syllok bad ki dkhot jong ki kynhun bapher bapher jong ka thaiñ ha Moreh bad la pynbud ruh da ka jingïalang bad ki kynhun ka imlang sahlang ha Kangpokpi. Hadien ktei, la pynlong ruh ïa ka jingïalang peit bniah ha kaba ïadei bad ka shongsuk shongsaiñ ïa kaba la pynlong ha nongbah Imphal.
