Shillong, Jymmang 31:
Ka komiti kaba la thaw da ka Sorkar ban ïakren halor ka jingpyntreikam ïa ka ‘Reservation Roster System’ bad ka ‘Reservation Policy’ ka la shim ïa ka rai ban pynsngew sha ka Sorkar ban thung noh da ka komiti ki ’riewshemphang ne ka ‘Expert Committee’ ka ban khmih bniah ïa ka ‘Reservation Policy’.
Ïa kane la pynbna da u General Secretary ka Voice of the People Party (VPP), Dr. Ricky Syngkon ha ka Sngi Balang haba ai jingkren sha ki paidbah ha ka jaka shah thngan u President ba rangbah ka seng, Bah Ardent M. Basaïawmoit hajan Additional Secretariat hadien ka jingïalang jong katei ka komiti.
“Ngi don hangne ban pynbna kaei kaba mih na ka jingïalang ïa kaba ka Sorkar ka la khot lang ïa baroh ki seng saiñ pyrthei. Na ka liang jong ngi, ngi la ong sha ka Sorkar ba donkam ban khmih bniah ïa ka ‘Reservation Policy’ bad kumno ban leh ïa kata…ngi ong ba donkam ban da thung da ka ‘Expert Committee’ ka ban khmih bniah ïa kane ka ‘Reservation Policy,” la ong u Dr. Syngkon.
U la ong ba katei ka komiti jong ki seng saiñ pyrthei bapher-bapher ka la shim ruh ïa kawei ka rai ban pynsngew sha ka Sorkar ban thung noh da ka ‘Expert Committee’ ban khmih bniah ïa ka ‘Reservation Policy’.
Haba kdew ba katei ka long ka jingjop jong u paidbah, utei u nongïalam u la ong ba kane ka long ka khubor kaba sngewtynnad ba hadien ka jingïaid lynti kaba 9 sngi jong ka jingïakhih, la ïoh ban kheit ïa u soh.
Na ka liang u President rangbah ka seng haba ai jingkren ha kane ka sngi u la ong, “Nga sngewtynnad bad sngewsarong ba ki nongïalam jong ngi ki la lah ban pynkohnguh ha kane ka jingïalang jong baroh ki seng saiñ pyrthei ba donkam ban khmih bniah ïa ka ‘Reservation Policy’.”
U la pynpaw ruh ka jingsngewkmen ba kata ka komiti kaba ka Sorkar ka la thung ka la shim ïa ka rai ban thoh sha ka Sorkar ha ka ban thaw noh ïa kata ka ‘Expert Committee’ ban khmih bniah ïa ka ‘Reservation Policy’.
“Ngi la jop hynrei ngim pat dei ban hun. Dei namar kata ka daw, kum u nongïalam ka seng, lymda ngi ïoh da ka jingthoh kaba shai ba ka Sorkar kan thaw ïa kane ka ‘Expert Committee’ ban khmih bniah ïa ka ‘Reservation Policy’, ngan ym pat sangeh ïa kane ka jingshah thngan,” la ong u Bah Basaïawmoit.
Halor katei ka bynta, u la ong ba lashai ka sngi (Sngi Palei) un jam sha ka sngi kaba 10 jong ka jingshah thngan bad ka shong ha ka Sorkar lada ka kwah ba ka jingïakhih kan kut noh.
Kumta, u President u la ong ba ka Sorkar ka dei ban pynsted ha ka ban pynpoi ïa ka jingthoh sha ka seng halor katei ka bynta bad dei tad haduh kata ka por ba ka seng kan sa sangeh bad leit phai sha la ïing da ka jingjop.
“Nga long uba kloi ban dang shah shitom, nga la rai naduh ba la ïakren bad ka seng ba ngan sdang ïa kane ka jingïakhih shah thngan ba khlem buh por. Haba nga la rai, nga la rai, ba ngan ym phai ïing tad haduh ba ka Sorkar kan kohnguh ban khmih bniah ïa kane ka ‘Reservation Policy’,” u la ong.
Shuh shuh u la bynrap, “Lada ka Sorkar ka kylla dien, kata ngin hap ban ïa mih paidbah. Ka Sorkar ka la dei ban ïohi ïa ka lynti kaba ngi jied. Naduh ka sngi ka banyngkong ngi la jied ïa ka lynti ban ym pynwit ïano-ïano.”
