Shillong, Jymmang 31:
Ka Expert Committee on the Reservation Policy bad Roster System kaba la ïakynduh ha ka Sngi Balang, ka la ïoh ban shim ïa ki jingai jingmut na ki seng saiñ pyrthei bapher bapher jong ka jylla halor ka Roster System bad ha kajuh ka por ban tyrwa ruh sha ka Sorkar Jylla ban thaw ïa ka ‘Expert Committee’.
Haba kren sha ki lad pathai khubor hadien ba la wai ka jingïalang, ka Chairperson jong ka komiti ka Kong Ampareen Lyngdoh kaba dei ruh ka Myntri Sorkar ka la ong ba ka jingïatai ïathir ka la long kaba seisoh, ha kaba shibun ki jingai jingmut bad ki jingïakren ki la mih, kynthup halor ka jingthaw ‘expert committee’ ka ban kynthup ïa ki riew shemphang na ki kam aiñ, kiba tip ïa ka Riti Synshar ka Ri bad ki briew na ka tnat Economics ki ban khmih ïa ki jingkheiñ bad samari halor ka jingdon paid bad kiwei.
Ha kane ka jingïalang la wan ban ïashim bynta da ki seng saiñ pyrthei bapher ka jylla kiba kynthup ïa ka NPP, UDP, HSPDP, BJP, Congress, AITC, VPP, GNC bad ka KHNAM.
“Ngi la dep ban kyrpad ïa baroh ki seng saiñ pyrthei ba ngin sa phah ha ka rukom kaba biang ïa baroh kine ki jingïakren bad ki jingmih sha ka Sorkar; ha kaba ka Sorkar kan sa bishar bad peit bniah bad ban shim ïa ka rai halor baroh ki jingai jingmut ïa kiba ngin sa phah,” ka la ong.
Ka la pyntip ruh ba ki la don katto katne ki seng saiñ pyrthei kiba la ai jingmut ba ka jingthung kam ka dei ban sdang tad ynda la sngewthuh shai halor ka ‘roster system’ da ki seng saiñ pyrthei kiba khlem ïadon bynta ha ka jingïalang kaba la dep.
“Ka jingthaw ïa ka Expert Committee kan dei kawei na ki jingtyrwa ban sa phah sha ka Sorkar Jylla da ka komiti,” ka la ong haba pyntip ba kane ka komiti ki stad ki jhad kan don ïa ki briew ba tip aiñ, kiba tip ïa ka Riti Synshar ka Ri bad ki briew ki ban khmih ïa ki jingkheiñ bad samari halor ka jingdon paid.
Ka Kong Ampareen kaba dei ruh ka Myntri ka tnat Aiñ, ka la ïathuh pat ba ym baroh ki seng saiñ pyrthei kiba la mynjur ban don ïa ka Expert Committee.
“Ki don ki seng saiñ pyrthei kiba mynjur bad ki don ruh ki seng saiñ pyrthei ki bym mynjur. Mynta ngin leh ïa la ka jong ka kam da kaba phah ïa ki jingïakren baroh hapoh ka jingïalang sha ka Sorkar Jylla,” ka la pyntip.
Ka la ong ba ki seng saiñ pyrthei bapher bapher ki don ïa la ki jong ki jingpynsngew halor ka kam ba ïadei bad ka Job Reservation Policy.
“Don kiba kwah ban neh kumjuh, don kiba kwah ban bishar thymmai, hynrei kine ki mat baroh ki dei kiba la shu ïakren. Mynta, ngim lah ban shu ïakren hakhmat jong ka komiti bad khmih lynti ba ka komiti kan sngewthuh lut ïa kaei kaba phi mut,” ka la ong haba bynrap “Kaba ar ka long ba phi lah ban wanrah da ka ‘menu’ ba kdew ba ngi kwah ïa kane, kwah ïa katai, hynrei ïa kane ruh phi hap ban pynksan khnang ba kiwei ki seng saiñ pyrthei ruh kin ïoh pyni ïa la ki nia bad ba ngin nang lah ban ïakren biang”.
Haba kyntu ïa baroh ki seng saiñ pyrthei ban ai ïa ki jingai jingmut da ka jingthoh halor kane ka kam hapoh ka 15 sngi, ka Kong Ampareen ka la ong, “Ngi la kyrpad ïa baroh ki seng saiñ pyrthei ba kin pynkhreh ïa ki jingai jingmut, ban weng ïa ki kyndon, ki jingmait ïa ki kyntien na ka Policy kiba shong aiñ bad ngi lah ban ai jingmut kat kaba ngi kwah hynrei ngi dei ban pynthikna ba ngi sngewthuh ïa ki kyndon aiñ ba kan nym don jingktah ïa ka Sorkar hadien habud”.
“Namar kata, ngin sa buh jingthoh lut ïa baroh ki jingïakren bad ngin sa phah ïa ki sha ka Sorkar. Hynrei katba ka komiti kam pat ïoh ïa ki jingai jingmut da ka jingthoh kiba shong aiñ na ki seng saiñ pyrthei, ka komiti ka lah ban ïakynduh bad ïakren ïa kano kano ka kam,” kala pynpaw.
Shuh shuh ka la pyntip ruh ba ki ar tylli ki seng saiñ pyrthei ki bym shym la wan sha ka jingïalang ba nyngkong jong ka komiti bad ki bym don jingtip ïa ki jingïakren halor ka Roster System, kin sa ïakynduh biang bad ki ophisar ban pynhun ïa ki jingsngewthuh jong ki halor ka Roster System.
Ka komiti ka la tyrwa ban shong jingïalang biang hadien ka lai taïew.
