Shillong, Jymmang 31:
Ki MLA ka Congress kiba la leit ban ïashim bynta ha ka jingïalang jong ka komiti ba la thaw da ka Sorkar halor ka Reservation Roster bad Reservation Policy, ki la ai jingmut sha ka komiti ban don noh da ka expert committee ban bishar ïa ki jingai jingmut jong ki seng saiñ pyrthei halor ka jingpynkylla thymmai ïa ka aiñ bhah kam lane ka State Job Reservation Policy.
Haba kren bad ki lad pathai khubor hadien ka jingïalang, u MLA na Mylliem uba dei ruh u nongïalam ka Congress Legislature Party (CLP), u Bah Ronnie V Lyngdoh u la ong ba ka party ka sngew ba la donkam ban peit bniah biang ne review ïa ka Reservation Policy namar ka dei ka aiñ kaba la rim haduh 51 snem.
U la pyntip ba na ka liang ka seng Congress kan sa phah ïa ki jingai jingmut sha ka Sorkar ha kine ki artaïew ban wan, hadien ba ka party ka la ïasyllok bad ki briew kiba tip ïa ka aiñ.
Nalor kata, u la ong ba na ka liang ki MLA ka Congress kiba la leit ban ïashim bynta ki la ai jingmut ban thaw ïa ka expert committee. Ha katei ka komiti dei ban don ki riewshemphang naduh kiba tip ïa ka jinglong jingman ki jaka bad ka jingbun briew, kiba tip ïa ki riti synshar, kiba tip ïa ki aiñ bad kumjuh kiba tip ïa ka ïoh ka kot.
Haba kylli halor ka jingkren jong u MLA ka Congress na Gambegre, u Saleng A Sangma ban ai beit 80% sha ki Khasi, Jaiñtia bad Garo, na ka liang utei nongïalam ka CLP u la ong ba kum u MLA u don ïa ka hok ban pynpaw ïa kaei kaba u don. Hynrei kum ka party pat ka sngew donkam ban da ïathir ïatai bad ïa ka rai ba khatduh yn shim beit kum ka party.
“Shwa ba ngin leit sha katei ka jingïalang ka komiti ruh, ngi la dep ban shong jingïalang para ma ngi, la bunsien ban ïatai para ma ngi namar ngi sngewthuh ba ka long ka kam kaba kongsan na ka bynta ka lawei ki khun samla jong ka jylla bad ki pateng ban wan,” la ong u Bah Ronnie.
“Kum ka Congress ngi ai khublei ïa ka Kong Ampareen Lyngdoh kaba dei ka Chairperson ka komiti, ki ophisar kiba la sngap ïa ki jingai jingmut ki jong ngi. Ngi ai khublei ruh ïa baroh ki seng saiñ pyrthei,” u la ong.
