Khliehriat, Jymmang 31:
“Ngim don kano kano ka jingtip bad ngim don bynta ban pharia ïa ka jaidbynriew,” la ong ki 11 ngut ki Waheh Shnong jong ka thaiñ Narpuh ha kaba ïadei bad ka jingdawa jong ka Synjuk ki Waheh Ri Jaiñtia ban ai bhah 20% ïa ki Jaiñtia hapoh ka Reservation Policy.
Kine ngut ki Waheh Shnong ka thaiñ Narpuh ki kynthup ïa u Lasting Pala Waheh Shnong Umkiang, Jenisal Pohkyrnu Waheh Shnong Dona Skur, Love You Bareh Waheh Shnong Pyrtakuna, Min Lamare Waheh Shnong Kuliang, Sharai Lamare Waheh Shnong Borsara, Edimon Lamare Waheh Sonapyrdi, Fantin Pajat Waheh Shnong Lumphyllut, Pynkhlain Dhar Waheh Shnong Ratacherra, Wol Tariang Waheh Shnong Dona Umbluh, Robi Suchiang Waheh Shnong Umstain, Mit Dkhar Waheh Shnong Lahalein. Ki la ong ba ki ai ka jingkyrshan kaba shispah shah ïa ka jingïakhih jong u Bah Ardent M. Basaïawmoit na ka bynta ka jingdawa ban pynkylla ne pynthymmai noh ïa ka bhah thung kam hapoh ka jylla.
Kane ka jingkyrshan jong ngi ka long namar ka jingïakhih ka long kaba don nongrim na ka bynta ka jingbha jong ka lawei ki khun ki kti jong ngi hapoh ka bri u Hynñiewtrep.
Ki la ong lada long kumno kumno ruh, kin ai jingkyrshan pura ïa u Bah Ardent nangne shakhmat ha kaba ïadei bad kane ka bhah thung kam thung jam bad lada jia ban ïa mih paidbah ruh kin mih ha kano kano ka por.
Ha kaba ïadei bad ka jingdawa jong ka Synjuk Waheh Shnong Ri Jaiñtia, ki la ong ba kim don kano kano ka jingtip bad kim don bynta hi ruh ban pharia ïa ka jaitbynriew, hynrei ngi ïa long shitylli (kawei) kum kawei ka jaitbynriew kaba ong, “Khynriam u Pnar u Bhoi u War, u dei u paid Khasi baïar”.
