Shillong, Jymmang 31:
Ka lympung ïalehkai Chief Minister’s State Level Inter School Athletic Meet 2023 ka la sdang ha ka Sngi Balang ha Sports Authority of India (SAI) Training Centre kaba don ha skulbah NEHU, Shillong.
Ha kane ka lympung ïalehkai kaba lai sngi la wan ïashim bynta da ki kynhun ïalehkai jong ki 12 tylli ki district jong ka Jylla. La plie ïa kane ka lympung da ka Director ka tnat ïalehkai ka Kong Isawanda Laloo kum ka kongsan ha ryngkat ka jingïadon lang u Working President ka Meghalaya State Olympic Association (MSOA) Bah John F. Kharshiing kum u symbud kongsan, ki Assistant Director kita u Bah Paia War Nongbri bad u Bah Khroo Passah, ki District Sports Officer, ki coach, ki khynnah skul bad kiwei kiwei.
Ïa kane ka lympung la phiah ha ki lai tylli ki kyrdan ïalehkai jong ki khynnah shynrang bad kynthei kiba kynthup ïa ka Under-14, Under-16 bad Under-18. Ki jingïalehkai ha kane ka lympung ki kynthup ïa ka jingïakob mareh bapher bapher, Long Jump, High Jump, Shot Put, Discuss bad Javelin throw.
Ka Kong Isawanda haba ai jingkren ha kane ka sngi, ka la pynpaw ba kum ki khynnah ki dei ban long kiba trei shitom khnang ba ki lah ban khur ïa ka jingjop. “Ha ki ar bnai ba la lah, la pynlong ïa kane ka lympung ïalehkai ha baroh ki district ha shwa ban jied ïa ki khynnah kiba kynsai ki ban ïashim bynta ha ka kane ka lympung.”
“Ha kane ka lympung ki la don haduh 818 ngut ki khynnah na baroh ki district kiba la wan ïashim bynta. Kumta ngi khmih lynti ba kin ïalehkai bha ban pynpaw ïa la ki sap namar ngi kwah ban ïohi mano ba kham tbit napdeng jong ki bad ban pynpra ïa ki rekod ha kane ka lympung,” ka la bynrap
Kham ha shwa u Bah John Kharshiing u la pynpaw ba ki khynnah ki dei ban bishar bniah ïa ka Sports Policy ïa kaba la ithuh da ka Sorkar Jylla naduh u snem 2019.
Lyngba kane ka Sports Policy ki khynnah kin ïoh shibun ki jingmyntoi namar ka Sorkar ka la pynkhreh ïa ki khusnam bapher bapher na ka bynta jong ki haba kiba khur takma ha la ka jong ka Jylla bad wat shabar ruh kumjuh.
Kum ban shu pynkynmaw ha u snem ba la dep, ka North Garo Hills ka la rah ïa ka nam lahduh, katba ka East Khasi Hills ka la wan ha ka kyrdan ba-ar bad ka lahduh jong u 2019, ka Ri Bhoi District ka la wan balai. Hynrei ka jingkylli mynta ka long mano ban rah ïa ka nam lahduh mynta u snem?
