Shillong, Jymmang 31:
Ka FC Goa ka la pyntikna ba kan pyllait noh ïa u rangïalehkai phutbol ka Jylla, u Redeem Tlang lem bad hynriew ngut kiwei kiba ïashim bynta ha ka Indian Super League hadien ba ka kontrak ka la poi sha kaba kut ha ka Sngi Balang.
Kine hynriew ngut ki long u Anwar Ali, Makan Chothe, Hernan Santana, Marc Valiente, Lenny Rodrigues bad u Nongdamba Naorem,
Kane ka klob ka la ai khublei ïa ki halor ka jingnoh synñiang, ka jingïeit bad ka jingkyrshan ha kine ki snem.
U Ali u la leit phai sha ka Delhi FC hadien ba ki 18 bnai jingïateh ki la poi sha kaba kut naduh ba u la pynïasoh sha ka Goa ha u Kyllalyngkot jong u snem 2022. Une u rangïalehkai ‘dien u la ïoh ban ïalehkai 30 sien ha ka Indian Super League (ISL) ha ki ar tylli ki aïom.
U Chothe bad u Tlang ki la ïoh ban ïalehkai haduh 40 sien na ka bynta ka FC Goa ha ka ISL, Durand Cup bad kumjuh ha ka Hero Super Cup. Kine ar ngut ki la ïadon bynta ruh bad katei ka kynhun kaba la ïashim bynta ha ka AFC Champions League ha u 2021, bad kan dei ruh ka sien kaba nyngkong eh ïa kane ka klob jong ka ri ban ïoh ïalehkai ha ka dewbah Asia.
U Valiente u la pynïasoh sha ka FC Goa ha ka aïom ba la dep, hynrei um shym la ïoh ban ïalehkai bha na ka daw ka jingmynsaw hapdeng jong ka aïom ïalehkai 2022-23. U Santana u la ïasoh sha ka Goa na ka bynta ban mih bujli ïa utei u rangïalehkai, ha kaba u la ïoh ban ïalehkai hynñiew sien.
