Paris, Jymmang:
Uwei na ki rangialehkai tennis ka ri Russia uba bat ia ka kyrdan ba-ar ha ka pyrthei u Daniil Medvedev, u lah shah pynkut noh ka jing-iaid lynti ha ka French Open tang ha ka kylla iakhun ba nyngkong. Kane ka wan hadien ba utei u rangialehkai u lah mad ia ka jingshah pynrem ha ki san ‘set’ iakhun ha u nong-ialehkai ba dang khynnah u Thiago Seyboth Wild.
Kumta ha kaba iadei bad katei ka bynta, u Seyboth Wild uba lah rung sha ka lympung lyngba ka qualifiers bad u bym shym la rah kano kano ka jingjop ialehkai ha ka Grand Slam, u la lah mynta ban pynleit iing noh ia utei u khlur ialehkai na Russia da 7-6 (7/5), 6-7 (6/8), 2-6, 6-3, 6-4.
Ka long ruh ka jingshah rem kaba san ha kaba u Medvedev u lah mad ha kaba sdang jong ka kylla ialehkai ha Roland Garros ha ki hynniew sien ialehkai kiba u lah ioh ban mih madan ha ka lympung.
Kumta ruh u Seyboth Wild, u bym shym la khur kano kano ka jingjop ha kum katei ka lympung ialehkai ba paw naduh u Rymphang 2022, u lah pynkhlain ka rukom ialehkai ka jong u ha katei ka jingiakhun pyrshah bad u Daniil ha ka jngiakhun kaba lah neh haduh saw kynta 15min. kumta ruh hadien katei ka jngjop, u Seyboth u lah ban iakynduh bad u Guido Pella ne bad u Quentin Halys na ka bynta ka jingiaknieh jaka sha ka last 32.
Ha kawei pat ka jingialehkai, ka nongialehkai na Russia ka Mirra Andreeva ka lah ioh ban pruiddak ialade ha ka lympung iakhun Grand Slam da kaba khur noh shalade ia ka 6-2, 6-1 jingjop pyrshah ia ka Alison Riske-Amritraj na USA. Shuh shuh ruh ka nongialehkai kaba lah wan ba-ar ha ka Wimbledon bad US Open ka Ons Jabeur da kaba suk ka la lah ban jop pyrshah ia ka nongialehkai na Italy ka Lucia Bronzetti da 6-4, 6-1.
Kumjuh ruh ka jing-iaid lynti jong ka Coco Gauff kaba lah wan ba-ar ha katei ka lympung ialehkai ha u snem ba lah dep, ha ka lympung iakhun kaba mynta ka la lah ban iakhun da kaba tyngeh haduh ba kan da khur noh shalade ia ki 3-6, 6-1, 6-2 jingjop pyrshah ia ka Rebecca Masarova na Spain, hynrei ka Barbora Krejcikova ka lah shah pynliem noh ha ka kylla iakhun ba nyngkong da 6-2, 6-4 ha ka nongiakhun pyrshah na Ukraine ka Lesia Tsurenko.
Katba ka Elena Rybakina ka lah kynthet noh ia kata ka jingialehkai ba suki jong ka ha kaba sdang na ka bynta ban pynliem pat ia ka nongialehkai na Czech Republic ka Brenda Fruhvirtova da 6-4, 6-2.
Kiwei pat ki khubor ki iathuh ba u Casper Ruud uba lah wan ba-ar hadien u Rafael Nadal ha katei la lympung ialehkai ha u snem ba lah dep, ha ka jingiakhun jong u kaba mynta u la lah ban pynliem noh ia u nongialehkai na Sweden u Elias Ymer da 6-4, 6-3, 6-2.
Shuh shuh ruh u Alexander Zverev u lah khur mynta ia ka jingjop kaba saw ha ki saw jingialehkai pyrshah ia u Lloyd Harris na South Africa da 7-6 (8/6), 7-6 (7/0), 6-1, katba u Andrea Vavassori u la lah ban iada ia ki san dor-thong ialehkai na ka bynta ban pynliem noh ia uba na Serbia u Miomir Kecmanovic da 5-7, 2-6, 7-6 (10/8), 7-6 (7/3), 7-6 (11/9).
