Bangkok, Jymmang:
Ka jingiaid lynti jong ka kynhun ialehkai Badminton ka ri ha kaba sdang jong ka lympung ialehkai ba mynta ka Thailand Open ka lah long kaba seisoh, ha kaba uwei na ki rangialehkai ka ri u Kiran George u lah khur shalade ia ka jingjop ha baroh shi lynter jong ka jingialehkai ha ka jingiakhun pyrshah bad u Shi Yuqi na China da 21-18 22-20; na ka bynta ban jam pat sha ka rynsan iakhun pre-quarterfinal ha ka lympung bad hadien katei ka jingjop, u Kiran un pynkhreh na ka bynta ka jingiaknieh rung sha ka quarterfinal bad u rangialehkai na China u Weng Hong Yang.
Kumjuh ruh ha kawei pat ka bynta jong ki jingialehkai ha ka lympung, ka Ashmita Chaliha bad Saina Nehwal ruh kumjuh ki la lah ban sdang ia kaba sdang jong ka jingiaid lynti jong ki ha ka lympung da ka jingjop ba ki lah khur na ka jingiakhun paramarwei. Kumta ha ka jingiakhun jong ki kynthei, ka Ashmita kaba lah jam sha ka lympung lyngba ka jingshah jied ka jong ka, ka la lah ban pynliem noh ia ka nongiakhun pyrshah kaba na kajuh ka ri ka Malvika Bansod da 17-21 14-21. Katba ka nongkhur takma Rnong na ka London Olympic ka Saina Nehwal ka lah pynliem noh ia ka nongialehkai na Canada ka Wen Yu Zhang da 21-13 21-7. Hadien katei ka jingjop, ka Ashmita kan iakynduh sa bad ka nongkhur takma Ksiar na ka Rio Olympic ka Carolina Marin katba ka Saina ka pynkhreh ban iakynduh bad ka nongialehkai ba kham tbit na China ka He Bing Jiao. Shuh shuh ha kawei pat ka jingiakhun paramarwei ki shynrang, u Kidambi Srikanth u lah shah rem noh da 8-21 21-16 14-21 ha u nongiakhun pyrshah na China u Weng Hong Yang bad u Praneeth u shem ba u rangiakhun pyrshah jong u na France u Christo Popov u long uba jwat ban pynliem haduh ba un da mad noh ia ka jingshah pynrem da 14-21 16-21. Kumta ruh ka Priyanshu Rajawat kam shym la lah ban jam shakhmat ha ka lympung hadien ba ka lah shah rem noh ha ka nongialehkai na Malaysia ka Ng Tze Yong da 19-21 10-21.
Kumjuh ruh u Sameer Verma uba lah khur ia ka jingjop dang shen na ka Slovenia Open, u lah shah pynrem noh da 15-21 15-21 ha u nongialehkai na Denmark u Magnus Johannesen. Ka khubor ka iathuh ruh ba ka BWF World Tour lah phiah ha ki hynriew kyrdan; kata ka World Tour Finals, 4 tylli ka Super 1000, 6 tylli ka Super 750,7 tylli ka Super 500, bad 11 tylli ka Super 300. Kumta ka Super 500 ka hap ha ka Grade 2 ( kyrdan ba 4) jong ka rynsan ialehkai ha ka BWF tournament Ranking System.
