Sa ha Khliehriat bteng ka JCCRP ïa ka jingïakhih dawa pynkylla ïa ka bhah thung kam

Kane ka policy ka dei shisha kaba ktah ïa ka trei ka ktah jong ki khynnah samla Khasi Jaiñtia.

Khliehriat, Jymmang 31:

Ka jingïakhih shong kyllaiñ mungor ban dawa pynkylla ne pynthymmai noh ïa ka Meghalaya State Reservation Policy (MSRP) kaba la 51 snem ka la bteng sa ha nongbah Khliehriat, East Jaiñtia Hills District ha ka Sngi Balang mynta ka taïew.

          Ïa kane ka jingïakhih la pynlong da ki kynhun seng hapoh ka lama jong ka Jaiñtia Coordination Committee on Reservation Policy (JCCRP) ba kynthup ïa ka Jaiñtia Students’ Movement (JSM), Jaiñtia Students’ Union (JSU), East Jaiñtia National Council (EJNC), ka Synjuk Waheh Shnong ri Jaiñtia bad Synjuk Waheh Shnong Jowai.

          U Bah Kynjaimon Amse uwei na ki nongsaid aiñ ba paw ka District haba shim bynta ha ka jingkren u la ong, naduh u snem 1972 ka jingsdang (Foundation) jong ka Reservation Policy ka dei kaba noh shiliang sha ki jaidbynriew Garo.

          U la ïathuh ba u dei uwei uba shah ktah ha kane ka policy bad ha u snem 2021 u la ïaleh ïa ka interview MPSC hynrei u khlem poi sha ka thong namar kane ka policy.

          Nangta u la ong ruh bun ki khynnah samla mynta kim sngew donkam shuh ban pyndep ïa ki jingpule namar da ki ïoh 99% ruh hynrei ka kam ka jam yn ïoh hi da u 45%. Kane ka policy ka dei shisha kaba ktah ïa ka trei ka ktah jong ki khynnah samla Khasi Jaiñtia.

          Katba u samla Treiborlang Suchen haba kren halor ka Roster ne ka bhah ban buh beit ryntih ïa ka jingthung kam, u la ong ba ka clause 2 jong ka Reservation Policy 1072 ka kren shai ba ki kam kiba ym lah ban pyndap ha u snem ba lait ka kam, yn ym lah ban ai bhah biang hadien u snem ba ar, bad na ka jingthaw kyrkieh ka sorkar ïa ka roster lyngba ka Office Memorandum ha u snem 2022 shwa ka ilekshon bad ha kane ka Roster ka don ha ka Clause D ka ban pynduh nong ar shah ïa ki Khasi Jaiñtia.

U la ong ruh ba ka jingthmu ban pyntreikam ïa ka roster naduh u 1972 bad kane ka long ban ai lad shuwa ïa u Garo ban pyndap ïa baroh ki kam ba lait ha ki ophis sorkar. Kane kan pynduh nong arshah ïa ki Khasi-Jaiñtia namar haduh ban da dep pyndap ïa kine ki kam kiba lait da ki Garo bad kane kan shim por haduh 30 snem ïa ki Khasi Jaiñtia ban ïoh rung kam biang ha ki ophis sorkar.

          Ïa ka jingïalang la pynïaid da u Roytre Dkhar JSM bad la ïoh ka jingkren maitphang na u Secretary ka JCCRP u Sambormi Lyngdoh bad ki jingkren na ki nongïalam sengbhalang ba kynthup u Working President JSM u Jimmy Kharmuti, u Bishar Shylla Secretary Synjuk Waheh shnong Ri Jaiñtia bad kiwei kiwei.