France, Jymmang:
Ka khlur ialehkai Tennis na ka ri Poland ka Iga Swiatek kaba dang iai bat ruh kum ka lahduh ha ka pyrthei, ka long kaba kloi ha ka ban la jam shakhmat ha ka lympung ialehkai ba mynta ka French Open; ha kaba katei ka nongialehkai ka lah jam sa sha ka kyrdan ba-ar ha ka lympung hadien ba ka lah khur jingjop ha baroh ki set iakhun jong ka pyrshah ia ka nongialehkai na Spain ka Cristina Bucsa 6-4, 6-0.
Kumta ruh ka Iga ka dang ialeh ha ka ban tyrwa ialade shakhmat na ka bynta ban long ka thei ialehkai ba nyngkong ba kan lah pynseisoh ha ka jingiai bat ia ka nam kum ka khliehduh ha ka pyrthei ha katei ka lympung ialehkai ba mynta; naduh ka por jong ka Justine Henin kaba la lah ban leh ia katei ka bynta ha u snem 2007. Shuh shuh ruh ka khubor ka iathuh ba ka Swiatek kaba long ka lahduh ha katei ka lympung ialehkai ha Paris ha u snem 2020, ka lah pynlehnohei tang kawei ka jingialehkai sha ka Bucsa ha ka por ba ki arngut ki iakynduh ha ka Australian Open ha u bnai K’lyngkot mynta u snem.
Shuh shuh ruh ha katei ka jingiakhun ba mynta, ka lah shem jingeh ha ka ban pynwandur ka rukom ialehkai ha ka set iakhun ba nyngkong kaba lah mih haduh san tylli ki jingpynkhein dor-thong ha ka jngsambol. Hadien katei ka jingjop, ka Swiatek ka lah ban iakynduh sa bad ka Ylena In-Albon na Switzerland ne bad ka Claire Liu jong ka ri USA.
