Nongpoh, Jymmang 31:
Ha kawei ka jingjia ha ka janmiet jong ka Sngi Balang ha Ri Bhoi District, ki paidbah na kylleng katei ka thaiñ kiba ïaid lynti lyngba ka surok bah National Highway 6 la sakhi ba ki ïa muja bad shongshit ban tam ïa ki ’kha bseiñ kiba hap ha surok hadien ka jingkylla jong kawei ka kali Mahindra Pickup kaba don ïa u nombar ML05-H-3500.
Kumba la ïoh lum jingtip, la ïathuh ba kane ka la jia ha ki bynta jong ka shnong 19 Mer ha ka por kumba 3 baje eiei. Katei ka kali kaba kit ïa ki ’kha bseiñ ka dei kaba dang thmu ban hiar sha ka nongbah Guwahati bad ka la kylla noh hapdeng jong ka surok bah.
La ïoh jingtip ruh ba ha kane ka jingjia, u nongñiah jong katei ka kali u la mynsaw malu-mala.
Lyngba kane ka jingjia ka la wanrah ruh ïa ka jingduhnong kaba khraw ïa u trai jong kitei ki dohkha nalor ka jingduh jong ka kali.
