Imphal, Jymmang:
Ka Sorkar Manipur ha ka Sngi Ba-ar mynta ka taiew ka la pynbna ban pynbiang da ki lad jingïarap kiba kyrpang na ka bynta ki longïing jong kito ki nongshong shnong ka jylla kiba la duh ei ïa la ki jong ki jingim hadien ka jingmih jong ki jingïakajia bad jingïaumsnam kiba jur kiba la jia ha ka jylla Manipur naduh ka 3 tarik u bnai Jymmang.
Kat kum ka jingpynbna jong ka Sorkar, ka la pyntip ba kan pynbiang da ka song pisa kaba mar T.10 lak sha kitei ki longïing.
Kat kum ka jingpynbna la pyntip ruh ba ka Sorkar Jylla lem bad ka Sorkar Pdeng kan pynbiang mar shiteng na katei ka song jingïarap, kata, da mar T.5 lak.
Shuh shuh na ka liang ka sorkar ka don ruh ïa ka jingpynkhreh ban pynbiang da ki kam sorkar sha ki bahaïing jong kito ki nongshong shnong kiba la duh ei ïa la ki jong ki jingim.
La ïoh jingtip ruh ba ka la don ruh ka jingshah bthah ïa ka sorkar jylla ba lyngba ka jingïoh ïa ki lad jingïarap na ka sorkar pdeng kan pynbiang ïa ki mar kiba donkam man la ka sngi na ka bynta ki nongshong shnong.
Kum ban shu ïathuh hangne, ha ka sngi kaba ar jong ka jingleit jngoh ïa ka jylla Manipur, u Myntri Sorkar Pdeng ba dei khmih ïa ki tnat Kam Pohïing bad Cooperation, u Amit Shah u la pynlong ïa ka jingïalang bad ki kynhun ka imlang sahlang, ki ‘riew pawkhmat, ki ‘riew shemphang, ki ophisar shipai ba la shongthait bad ki ophisar ha Imphal ban ïakren halor ki mat kiba ïadei bad ka shongsuk shongsaiñ ha ka jylla Manipur.
