London, Jymmang:
Na ka liang jong ka International Cricket Council (ICC) hapoh ka jing-ialam jong u nongpyniaid bahakhliehduh katei ka synjuk lem bad u CEO, ki lah don mynta ha Lahore na ka bynta ban wad bad ban shem ia ka jingpyntikna ka ban wan na ka PCB, ba ka synjuk kan ym ialeh ban khynniat shakhmat ha kaba iadei bad ka jingpyntreikam ia ka ‘Hybrid Model’ na ka bynta ki jingialehkai jong ka kynhun ialehkai ka Pakistan ha ka ODI World Cup ka ban sa long mynta u snem ha India.
Shuh shuh na ka liang jong ka tyllong khubor kaba napoh ka pynthikna ruh ba u Chairman ka ICC u Greg Barclay bad u CEO ka ICC u Geoff Allardice ki lah pynbeit khnang na ka bynta ban leit sha katei ka ri na ka bynta ban ioh ia ka jingpynthikna kaba skhem na ka PCB ha kaba iadei bad ka jingshimbynta jong ka kynhun ialehkai jong ki ha ka tei ka lympung ban long ha India naduh u Risaw haduh u Naiwieng.
Katei ka jingshim ia ka rai ka long hadien ba u khliehduh ka PCB u Najam Sethi u lah dep ban kren shai ba ka kynhun baroh kawei hi kan ym wan ban shimbynta ha ka tei ka lympung ialehkai ka ban sa long ha India lada ka kynhun ialehkai na India hapoh ka jingialam jong u Rohit Sharma kam treh ban leit sha Pakistan na ka bynta ka jingshimbynta ka jong ka ha ka Asia Cup.
Kumta na ka liang jong ka ICC bad ka Board of Control for Cricket in India (BCCI) ki dap mynta da ka jingkhuslai kaba khraw ha kaba iadei bad kata ka ‘Hybrid Model’ ia kaba lah wanrah shakhmat da u Najam Sethi.
Kumta ruh, watla ka ‘Hybrid Model’ ka lah kylla long kum ka jingai jingmut da u Sethi na ka bynta ka Asia Cup ha ka jingiaid lynti jong ki kynhun sha ka rynsan ialehkai jong ka ICC bad ha kaba ka jingkhuslai mynta ka iaisah ha kaba lada shisien ba lah pdiang ha ka ban pyntreikam ia ka ha ki rynsan ialehkai jong ki thain bapher bapher, na ka liang jong ka PCB ka lah ruh ban kyntu ia ka ICC na ka bynta ban pyntreikam ia katei kajuh ka bynta na ka bynta ka lympung ialehkai World Cup lada ka Pakistan ka shim ia ka sienjam na ka bynta ban ialehkai ha India.
Na ka liang jong u Sethi u lah dep ruh ban pynpaw ba lada ka sorkar Pakistan kam shym la ai kano kano ka jingpynshai ne ka jingshngain ha kaba iadei bad ka jingphah ia ka kynhun ialehkai baroh kawei sha India, ka PCB ka lah ruh ban bthah ia ka ICC na ka bynta ban pynlong ia ki jingialehkai jong ka Pakistan ha ka madan ba long-pdeng bad ka bym shym la don sha kano kano ka liang ne ka bynta jong ki ar ri.
Kawei pat ka tyllong khubor ka iathuh ba katei ka long ka dawbah kaba nyngkong ha kaba balei u Secy jong ka BCCI u Jay Shah u dang iai long uba sniewbok na ka bynta ban pdiang ia ka ‘Hybrid Model’ na ka bynta ka Asia Cup bad ka jingkyrshan ruh kumjuh kaba don ia ki lai ne ki saw jingialehkai jong ka lympung ha Pakistan bad ba ki jingialehkai kiba sah kin long ha UAE ne Sri Lanka.
Kumba ka paw hi ka long ba ka Pakistan ka long ka pdengduh na ka bynta ban pynlong ia ka Asia Cup mynta u snem bad u Sethi u lah iai ban biang sa shisien bad lada ia ka lympung baroh kawei lah rah noh sha kawei ka ri kaba long-pdeng na Pakistan, khlem pep ka kynhun ialehkai jong katei ka ri kan ym shimbynta ha katei ka lympung.
