Mawkyrwat, Jymmang:
U Deputy Commissioner (DC) jong ka South West Khasi Hills District u la pyntip sha ki paid nongshong shnong ba ka Sorkar India ka la ai por ïa ka Sorkar Jylla ban pynbiang ryntih noh mar-mar ïa ki Aadhaar jong ki khyllung khynnah kiba dei ki nongïoh myntoi ïa ka Skhim Special Nutrition Programme (skhim ai bam ïa ki khynnah) kaba la long ka jingkyrkhu ïa ki khynnah rit kiba la ïoh ïa ki jingbam kiba tei ïa ki met ki phad jong ki, hynrei ki hap ban duh noh ïa kita ki jingmyntoi lada kim lah ban ïoh ïa ka Aadhaar Card.
Kumta la wer ïa ki kmie ki kpa jong ki hep barit bad ruh ïa kiba la san ba kin shimkhia ban pynkhreh ïa ki khun jong ki ban leit mih sha ki jaka ba la buh kyrpang na ka bynta ban shna ïa ki Aadhaar Card. Lada jia ba ki khun jong phi lane ma phi phim don ïa ki syrnot sngi kha, ki briew kiba la buh da ka sorkar kin sa ïarap ban batai kumno ban leh khnang ban pynsuk ïa ki paidbah.
Ki nongshna Aadhaar ba la pynbeit na DC ophis kin sa wan sha ki shnong jong phi kat kum ki prokram ba la shna kyrpang bad yn sa shna Aadhaar.
Kumba ïatip ba ka Sorkar India ka la pynsangeh noh ïa ka pisa jong kito ki Job Card holder kiba long ki nong bylla shispah sngi ki bym don ïa ka Aadhaar Card bad wat kito kiba don ïa ka Smart Card (MHIS) ruh mynta ki shem jynjar ban siew bai Hospital lada kim don ïa ka Aadhaar Card bad lada ki paidbah kim don lane khlem pyndonkam ïa ki Aadhar card kin duh ïa kiwei ruh ki skhim jong ka Sorkar India ka ban long ka jingduh jingmyntoi kaba khraw.
