Shillong, Jymmang 31:
Ka Chairperson jong ka Expert Committee on Roster System, ka Kong Ampareen Lyngdoh, ha ka Sngi Balang ka la ong ba ka Roster Committee kaba pynïaid ïa ka jingïatai bad ïathir halor ka State Reservation Policy (SRP) ka la sdang ïa ka jingïakren halor kane ka kam, hynrei ym don kawei ruh ka seng saiñ pyrthei (political party) kiba la wan shakhmat bad ki jingbatai shai ne ki jingthoh ba paka ban pyni halor ka jingdonkam ban wanrah jingkylla ha ka SRP.
Haba kren sha ki lad pathai khubor hadien ba la wai ka jingïalang, ka Kong Ampareen ka la ong, ka kam jong kane ka komiti ka long thik tang ban shim bad phai ïa ki jingai jingmut kiba mih ha kane ka jingïalang sha ka sorkar bad ban ai jingmut ruh ba dang donkam bun ki ‘expert committee’ ban ïakren halor kane ka mat.
“Ngi long beit thik tang ban pynïaid bad plie ïa ka jingïatai ïathir hapdeng ki seng saiñ pyrthei ka jylla halor ka mat State Reservation Policy kaba dei tang ka jingkhmih ka jong ngi. Ngi la pynsdang ïa ka jingïakren bad kiei kiei baroh kiba la ïakren ha kane ka jingïalang ki dang shu sah kumto namar baroh ki seng saiñ pyrthei kiba la wan, ki la pyni bad kdew ïa la ki jingpyni tang lyngba ka ktien khlem kano-kano ka jingthoh ban pynshisha.
Kumta, mynta kin hap leit sha la ki seng lajong bad ban pynshai kaei kaba ki kwah ban pyndam ne kynthup hapoh ka policy. Lada ki kwah ban weng ïa kino kino ki kyndon na ka policy, kumta kin hap ban ai ka jingpynshisha kaba paka katkum ka aiñ, halor kaei kaba phi kwah? Bad baroh kine dei ban ai lyngba ka jingthoh,” la ong ka Kong Ampareen.
Haba pyntip ba ki don katto katne ki seng saiñ pyrthei kiba ong ba dei ban pynneh ïa ka ‘status quo’ halor kane ka kam, ka Kong Ampareen ka la ïathuh ruh ba kim shym la lah pat ban pynshisha ba balei donkam ïa ka ‘status quo’ halor kane ka kam.
“Kumta ngim lah ban shuh shim kyllum ne thoh lyngkot ïa ka jingïakren bad ïatai ka jong ngi bad ban phah sha ka Sorkar, tad haduh ba kine ki seng saiñ pyrthei kin wan shakhmat ryngkat ki jingthoh pynshisha katkum ka aiñ halor ka jingtyrwa ban wanrah jingkylla, ban weng ne kynthup ïa ki jingdonkam ha ka policy,” ka la ong.
Nalor kata, ka la pyntip ruh ba la donkam ïa ka komiti kaba long kyrpang bha ka ban kynthup ïa ki riewshemphang na kito kiba don jingtip ïa ki riti treikam ka aiñ, kito ba tip bha halor ka jingsam ïa ka ïoh ka kot, kiba tip ïa ka jingkheiñ jingdiah, kam aiñ bad kiwei kiwei ban ïakren shuh shuh halor kane ka kam.
