Shillong, Jylliew 01:
U Myntri Rangbah ka Jylla, Conrad K Sangma, un pynlong ïa ka jingïalang bad ki kynhun bapher bapher na Ri-lum Garo ha ka 3 tarik Jylliew ban ïatai halor ki kam ba ïadei bad ka Roster System.
Ïa kane ka jingïalang yn pynlong ha Tura Circuit House ha ka por 11:30 baje mynstep, la ong ka kyrwoh na ka Sorkar.
Kane ka rai ban pynlong ïa ka jingïalang ka la mih hadien ba ki kynhun ne seng ki la kyntait ban ïashim bynta ha ka jingïalang jong ki kynhun seng kaba la buh ban pynlong ha Shillong.
Katto katne na ki kynhun kiba khmih lynti ban ïashim bynta ha kane ka jingïalang bad u Myntri Rangbah ki kynthup ïa ka Garo Students Union, ka Garoland State Movement Committee, Mothers Union of Tura, A’chik Holistic Awakening Movement, All India Garo Union, Association for Democracy and empowerment, A’chik Youth Welfare Organization, Federation for A’chik Freedom, All A’chik Youth Federation, A’chik Organization for Social Welfare bad ka Niksamso Garo Community Organization.
