Shillong, Jylliew 01:
Ka jingpynmih hukum ka Deputy Commissioner ka East Khasi Hills, ka Kong R.M Kurbah, ha ka Sngi Palei ba naduh ka 5 tarik Jylliew, 2023, yn pynïaid noh da ka Odd-Even System na ka bynta ki kali kamai ba kynthup ïa ki bos SPTS, ki Maxi Cab SSTS bad ki taksi na Kashari Point sha Khyndailad bad Motphran, ka la pynbitar lep ïa ki nongñiah taksi ha kane ka nongbah.
Kat kum ka hukum ba la pynmih da ka Kong Kurbah, ki kali kiba kut ha u nombor 1,3,5,7,9 kin ïaid na katei ka lynti; kata na Kashari Point sha Khyndailad bad Motphran ha ka Lah Sngi U Blei, Sngi Balang bad Sngi Thohdieng. Ki kali kiba kut ha ki nombor 0,2,4,6,8 kin ïaid na katei ka lynti ha ka Sngi Ba-Ar, Sngi Palei bad Sngi Saitjaiñ. Hynrei kane ka ‘Odd-Even System’ kan ym treikam ha ki Sngi U Blei.
Nalorkata, ka Deputy Commissioner ka la hukum ba baroh ki kali ki dei ban long kiba la pyndait da ka High Security Registration Plate (HSRP) bad dei ruh ban don lang bad ka Registration Certificate (RC) jong ka kali ha man la ki por.
Lada lap ïa kino kino kiba pyndonkam da ki nombor plate ba la pynkylla, ka Deputy Commissioner ka la maham ba yn sa pynshitom katkum ki aiñ kaba kynthup ïa ka jingpynduh noh ïa ka laisen jong u nongñiah kali.
Ka Kong Kurbah ka la ong ba ka jingkhapngiah jong ki kali ha Shillong ka kham jur ha ki jaka ïew ba kynthup ïa ka Khyndailad bad Motphran. Ha kajuh ka por, ka la ong ba ka jingdon ki kali kamai kiba ap ha ki lad Khyndailad bad Motphran ka wanrah ïa ka jingkhapngiah bad kane ka buh jingeh ïa ki nongpynïaid kali bad kumjuh ruh ïa ka jingshngaiñ jong ki nongïaid lynti.
Ka la ong ruh ba ka jingpynmih ïa katei ka hukum ka long hadien ba ka Meghalaya High Court ha u Nohprah 2021 bad ha ka 11 tarik Jymmang, 2023 ka la ai hukum ba dei ban shim ïa ki sienjam ban pynkylluid ïa ka jingkhapngiah ki kali ha Shillong khamtam ha ki jaka ïew bad ha ki jaka rung jaka mih.
Hynrei kane ka hukum na ka Kong Kurbah ka la pynbitar lep ïa kiba bun ki nongñiah kali kamai khamtam kiba ñiah taksi bad kiba ju hap ïaid na katei ka lynti man la ka sngi. Ki la pynpaw ba ïa katei ka hukum la pynmih khlem da ïakren ne ïathir shwa bad ki kynhun jong ki nongñiah kali.
