Shillong, Jylliew 01:
Ban pyntikna ba u Bah Ardent M Basaïawmoit un weng noh na ka jingshong shah thngan kaba khlem buh por, ka Sorkar Jylla ha ka Sngi Palei ka la thaw ïa ka ‘Expert Committee’ ne ka komiti ki stad ki jhad, ka ban shong bishar thymmai ïa ka bhah thung kam ha ka jylla ne State Reservation Policy.
Ïa kane la pynbna da u Chief Secretary ka Jylla u Bah DP Wahlang haba pynmih ïa kane ka jingpyntip (notify) ba la thaw ïa ka ‘Expert Committee’ kaba la wan lyngba ka tnat Personnel & AR (B) ka Sorkar Jylla. Pynban wat haba la thaw ïa kane ka ‘expert committee’, hynrei ym pat don satia pat ka kyrteng jong kino kino ki dkhot, katno ka por ba la buh.
Kat kum kane ka jingpyntip la ong “U Lat ka Jylla u pyntip halor ka ‘Expert Committee’ ka ban shong bishar thymmai ïa ka State Reservation Policy kumba la pyntip ha ka Resolution PER. 222/71/138 ba la pynmih ha ka 12 tarik Kyllalyngkot 1972”.
La ong ba u/ka Chairperson bad ki dkhot jong ka komiti kin kynthup ïa ki stad ha ka riti synshar ka Ri, ha ka ïoh ka kot, ka kheiñ ka diah, ka jingdon bun paid, bad kiwei kiwei ki bynta ki ban sa pyntip da ka Sorkar Jylla.
Kane ka komiti kan shong bishar thymmai ïa ka State Reservation Policy da kaba shim ïa ki jingai jingmut na baroh ki kynhun ka imlang sahlang bad ruh da kaba leit ïuhkjat sha baroh ki bynta jong ka Jylla.
Lah ban kdew, kane ka jingpyntip ka Sorkar ka la mih tang shisngi hadien ba ka komiti ki seng saiñ pyrthei kaba la ïakynduh ha ka sngi Balang ka la rai ban tyrwa sha ka Sorkar Jylla ban thaw ïa ka ‘Expert Committee’ ka ban shong bishar thymmai ïa ka Reservation Policy.
Haba pynbna paidbah ïa kane lyngba ki lad pathai khubor, ka Nongaiktien ka Sorkar ka Kong Ampareen Lyngdoh kaba dei ruh ka Myntri ka tnat Aiñ ka la ong, “Kane ka jingpyntip ka Sorkar ba la thaw ïa ka Expert Committee ka dei kaba mih na ka jingïalang jong baroh ki seng saiñ pyrthei ba long ha ka sngi Balang”.
Ka Kong Ampareen kaba dei ka Chairperson jong kane komiti ka la ong ba kan long kaba bakla ban ngeit ba kane ka kam ka dei kaba la pynpaw jingsngewkhia tang da kawei ne ar tylli ki kynhun.
Hynrei halor ka jingbuh por ïa ka Expert Committee, ka Chairperson ka la ong ba kam shym la don satia kano kano ka jingbuh por ne ka sngi bad ong “Ngi la ong ba ngin leh (bishar thymmai), katno kan shimpor ka dei ka kam kaba ka Sorkar kan sa peit. Ngam kwah ban buh ïa kano kano ka por namar kam ïahap satia. Hynrei, ki paidbah ki la peitngor bha bad ngi kyrmen ba ngin pyndep kloi ïa kane ka kam kham kloi kat kaba lah”.
Kumta ka la kyntu ïa baroh ki seng saiñ pyrthei ban ïaid katkum ka rukom ba dei ban ïaid halor kane ka kam. “Phah sha ngi da ka jingthoh, pynshong nongrim bha ïa ki jingai jingmut khnang ba ka komiti kan ïoh ïatai kumba ka long ïa kane ka kam ha ryngkat ki jingai jingmut ba buh da kiwei ki mamla”.
Namar kata, ka Kong Ampareen ka la kyntu ïa baroh ki seng saiñ pyrthei ba kin phah noh ïa ki jingai jingmut da ka jingthoh hapoh ka 15 sngi.
