Shillong, Jylliew 01:
Ka West Jaiñtia Hills ka la ïoh ban lamkhmat ha ka Chief Minister’s State Level Inter-School Athletic Meet 2023 ba la pynïaid da ka tnat ïalehkai ka Sorkar Jylla, katba ka lahduh jong u 2019, ka Ri Bhoi ka la wan ha ka kyrdan ba-ar.
Ha ka sngi kaba ar jong ka lympung ïalehkai, ka West Jaiñtia Hills ka la khur haduh 10 tylli ki takma ksiar, 3 tylli ki takma rupa bad kawei ka takma rnong. Ka Ri Bhoi ka la khur 6 tylli ki takma ksiar bad rupa lem bad 9 ki takma rnong.
Ka North Garo Hills kaba dei ka lahduh jong u snem ba la dep ka la wan ha ka kyrdan balai da kaba ïoh khur 5 tylli ki takma ksiar, 6 tylli ki takma rupa bad 4 tylli ki takma rnong.
Ka East Jaiñtia Hills ka la wan ha ka kyrdan basaw hadien ba ïoh khur 5 tylli ki takma ksiar, 3 tylli ki takma rupa bad 6 tylli ki takma rnong. Ka West Khasi Hills ka la wan ha ka kyrdan basan ha kaba ka la khur 4 tylli ki takma ksiar, 3 tylli ki rupa bad 9 tylli ki rnong.
Katba ka East Khasi Hills kaba la biang nadong shadong ki jaka ïalehkai khamtam na ka jingdon ïa ka synthetic athletic track, ka la wan ha ka kyrdan ba hynriew da kaba ïoh khur 4 tylli ki takma ksiar, 3 tylli ki rupa bad 2 tylli ki takma rnong.
Ïa kane ka lympung ïalehkai kaba lai sngi kynthih yn pynkut ha ka Sngi Thohdieng bad ki khynnah ïalehkai kin hap ban ïakhun tyngeh na ka bynta ban pynlong nam jop ïa ki district lajong.
