Shillong, Jylliew:
Ka Sorkar Meghalaya ka la ïa snohkti bad ka Terumo Blood and Cell Technologies ka la pynlong ïa ka rynsan ‘Behavioural Change Campaign’ na ka bynta ban pynsaphriang ïa ka jingtip bad jingsngewthuh shaphang ka jingaisnam sngewbha ne ‘Voluntary Blood Donation’ ha Ri- Bhoi District.
Ha ka 30 tarik Jymmang 2023, ka Myntri ka koit ka khiah, ka Dr. M. Ampareen Lyngdoh ka la plie ïa katei ka rynsan ha Parish Hall Nongpoh hapdeng ka jingïadon lang u DC ka Ri Bhoi District, DHS (MI) bad kiwei ki heh ophisar sorkar.
Ha ka jingïatreilang ryngkat bad ka Terumo Blood and Cell Technologies, ka tnat jong ka koit ka khiah jong ka sorkar Meghalaya lyngba ka State Blood Transfusion Counsil (SBTC) la pynbna ne plie ïa ka jingpynsaphriang ne ‘awareness’ shaphang ka jingkylla jingmut ne jingshai ka ba ki briew kin lah ban don ha ka jingïadei bad kaba ai snam mon sngewbha ïa kiwei pat ban pyllait ïa ki na ka jingma. Ïa kane ka jingplie la pynlong ha Ri-Bhoi District ka ba long ka Aspirational District. Ka Dr. M Ampareen Lyngdoh ka la pyllait ruh ïa u ‘Number Phone’ ïa uba ki paidbah ki lah ban ai “missed call” ban pynrung kyrteng ïalade kum u ne ka nong ai snam mon sngewbha (Voluntary Blood Donor). Uta u no u long +91995397533.
Ka mat kaba kongsan jong katei ka rynsan ka long ban pynsaphriang ïa ka rukom pyrkhat ha Ri Bhoi District halor ka jingaisnam mon sngewbha. Ka jingai snam kan long kaba da ka mon sngewbha ka ba khlem khmih lynti ïa ka bainong na ka bynta ban ai snam hynrei kan long tang ka jingnoh synniang ka ban tei ïa ka imlang sahlang. Da kaba pyndonkam ïa ki bor ‘technology’ ba mynta bad ruh ha kajuh ka por, da kaba ai jingpynshai bad jingdonkam jong ka jingai snam mon sngewbha kaba barabor, ka sorkar Meghalaya bad ka Terumo Blood and Cell Technologies ka thmu ban pynjah ïa ki jingngeit biet, ban pynbun ka jingïashimbynta ha kaba ai snam bad kumta yn pynïohbor ïa ka imlang sahlang ban pynim ïa ki parabriew kiba donkam snam.
Kawei ka mat jong ka rynsan ka long ban pyllait ïa ka kot lyngkdop ‘comic book’ kaba ha ki ktien bapher bapher. Kane ka kot dur ka ïathuh ïa ka khana kaba ïarap ban sngewthuh shaphang ki jingngeit bieit halor ka jingai snam bad kyntu ïa ki nongshong shnong jong ka Ri Bhoi District ban ïa wan shakhmat ban ai snam na ka bynta jong ka jingbha ha ka imlang sahlang. La pyllait ruh ïa ki ‘video’ jinghikai halor ka jingaisnam bad ka Myntri ka koit ka khiah, kaba la ong ba ka jingkylla ha ka rukom pyrkhat ka long kaba ïarap ban wanrah ïa ka jingkylla kaba bha ha ka imlang sahlang. Ka da kyntu ïa ki nongshong shnong jong ka Ri Bhoi District ban pdiang ïa kine ki jinghikai kiba saiñdur thymmai ïa ka pyrkhat pyrdaiñ halor ka jingaisnam bad ai mynsiem ba kin long kita kiba nyngkong ha ka jylla ki ban wan shakhmat ban long ki ‘voluntary blood donor’ ne nongaisnam mon sngewbha. Ka myntri ka la ai khublei ruh ïa ka tnat ka koit ka khiah, sorkar Meghalaya bad Terumo Blood and Cell Technologies na ka bynta ka jinglamkhmat ha kum kane ka rynsan kaba ktah ïa ka ïap ka im. Ka Terumo Blood and Cell Technologies ka dei ka kompani ka ba lam shakhmat ha ka pyrthei shityllup ha baroh kiei kiei kiba ïadei bad ka snam bad ka jingai jong katto katne ki riewpawkhmat ha ka ‘social media’ ban pyndonkam ïa ka rynsan jong ki khnang ban ïoh khring ïa ki khynnah samla ba kin don ka jingthrang ban bud nuksa ban shim bynta ha ki rynsan ban ïa ai snam mon sngewbha.
U Sampath Kumar, IAS, Principal Secretary jong ka tnat jong ka koit ka khiah, sorkar Meghalaya, u la pynsngew ïa ki jingmut jingpyrkhat ki jong u :”Ka jingdon jong ka snam kaba khuid kaba suba ka long kaba kongsan ha ka jingpynïaid jong ka tnat ka koit ka khiah. Kaba sngewsih ka long ba bun ki jaitbynriew ki jong ngi la tehlakam da ki jingmut kiba pynlong ïa ki ban jngai na ka jingai snam mon sngewbha. Ngi mut ba lyngba kane ka “Behavioral Change Awareness Campaign’ ba ngi sdang ha ri Bhoi distrik kan wanrah ïa ka jingsngewthuh ba janai bad jingïatreilang bad ki nongshong shnong ba kin wan mih khmat ban ai snam mon sngewbha ban wanrah ïa ka jingkylla kaba bha ïa ka lawei jong ka distrik.”
U Chetan Markham, U General Manager bad Senior Vice President jong ka Terumo Penpol Pvt. Ltd, Terumo Blood and Cell Technologies u pynsngew ïa ka jingsngew shitrhem na bynta kane ka rynsan. U la ong ruh “Ngi sngew sarong ban ïa treilang bad ka tnat jong ka koit ka khiah jong ka sorkar Meghalaya ban pyllait ïa kane ka rynsan ka ban wanlam jingkylla ïa ka Ri Bhoi District. Da kaba pyndonkam ïa ka bor jong ka lad pathai khubor, ngi thmu ban shna ïa ka nongrim kaba khlaiñ ban shaniah ïa ka jingai snam mon sngewbha naduh na tynrai. Ka jingïatreilang jong ngi kan wanrah ïa ka jingbiang pura jong ka snam ha ka district jong ka ri bhoi baroh kawei. Ngi don ka jingsngew skhem bad da ka jingïarap lang na ka liang jong ka sorkar ka Meghalaya, ngin sa lah ban ïa poi lang sha ka thong bad wanrah ïa ka rukom ai snam mon sngewbha ka ban long ka nuksa na ka bynta kiwei pat ki jylla.
Ha ka Jingpyllait ïa kane ka rynsan la ïadon bynta lem ruh ki riewpaw khmat ka jylla kynthup ïa ka Myntri jong ka tnat koit ka khiah, principal secretary jong ka tnat ka koit ka khiah, u deputy commissioner jong ka Ri Bhoi district, Director (DHS-MI) bad lem kiwei kiwei pat.
Ïa ka Blood Transfusion Services la pynïaid da ka Meghalaya State Blood Transfusion Council, Meghalaya AIDS Control Society, National Health Mission bad ka the State Drugs Licensing and Controlling Authority. Ka Blood Transfusion Services ka pyntikna ïa ki paidbah ba ki lah ban ïoh ka snam kaba khiud kaba suba, ha kano kano ka por. Ki don shiphew (10) tylli ki Blood Centre bad khatlai (13) ki Blood Storage Center ha ka jylla ka jong ngi, bad ki don ar (2) tylli ki Blood Center kiba don ïa ki tiar ban pynbynta ïa ka snam sha ki “Blood Components” bad kawei ka Blood Center kaba don ka “Apheresis” unit. Ka jingthmu ban pynkiew ïa ka jingaisnam mon sngewbha ka dei kaba kongsan ban ïoh ïa ka snam kaba shngaiñ. Ka jingïasnohkti lang, ka jingai jingsngewthuh bad ka jingai mynsiem sha ki seng bapher bapher, ki khynnah samla bad ki nongshnong shnong ka Ri Bhoi District kan long ka mawjam ban kot ïa ka 100% ka jingai snam mon sngewbha kaba la buh da ka World Health Organisation.
