Shillong, Jylliew 01:
U MLA ka Nongkrem konstitwensi bad uba dei ruh u President ka Voice of the People Party (VPP), Bah Ardent M Basaïawmoit, u la rai ban sangeh noh ka jingshong shah thngan hadien shiphew sngi hajan Additional Secretariat.
Kane ka rai ban sangeh shong shah thngan ka dei mynta ka sngi ka 1 tarik Jylliew, 2023 ha ka por 4 baje janmiet eiei hadien ba ka sorkar jylla ka la mynjur ban thaw da ka Expert Committee ba kan bishar bniah ha shwa ba kan pynbeit thymmai ïa ka bhah thung kam thung jam hapoh ka jylla.
Ïa kane ka shithi ka sorkar jylla ka la phah rah lyngba u majistor ka shlem treikam Deputy Commissioner, East Khasi Hills District ban leit pynpoi ha kti jong u Bah Ardent ha ka por 11 baje mynstep katba u dang shong shah thngan hajan Additional Secretariat.
Kumta mar ïa ïoh ïa katei ka shithi, u MLA ka VPP na Mawlai u la pynbna ba ïa ka rai halor kane ka shithi yn sa pynbna sha ki paidbah ha ka por 2:00 baje noh phai sngi. Na ka liang ki paidbah mar shu bna ïa katei ka khubor lyngba ki lad pathai ‘social media’ ki la wan tuid sha katei ka jaka ban sngap aïu ka khubor na ka liang ki nongïalam ka VPP ki don ban pynsngew.
Katba ha ka por 3 baje noh phai sngi u Bah Ardent u la ïeng na jaka ba u shong ban ai jingkren sha ki paidbah ban pule ïa ka shithi kaba ka sorkar ka la mynjur ban thaw ïa ka Expert Committee ka ban bishar bniah ïa kane ka bhah thung kam thung jam.
Hadien ba u la dep pule ïa ka shithi, u la pynbna ban sangeh noh ïa kane ka jingshah thngan kaba la ïaid haduh shiphew sngi.
Nalor kata, u la pynbna ruh ba kum ka dak ban sangeh ïa ka jingshah thngan u la khot ïa ki doktor ba kin pyllait noh ïa u thyrnia ba la pyndait ban ai ‘drip’ kaba la sdang naduh ka janmiet jong ka 31 tarik Jymmang.
Hadien ba la dep pyllait ïa ka ‘drip’ ka kurim jong u Bah Ardent ka la pyntian ja hakhmat ki paidbah bad hadien kata u Bah Ardent u la pynlong ïa ka jingduwai bad ki paidbah ki la duwai lang.
Kum ban shu pynkynmaw u Bah Ardent u la sdang ban shong shah thngan hakhmat Secretariat ha ka por 10 baje mynstep jong ka 23 tarik Jymmang 2023. Kumta namar ka ther u lapbah ha katei kajuh ka sngi la kynriah noh ha ka por janmiet sha Additional Secretariat ban lait na ka jingshah pynwit ha u slap bad pyllait na ka jingdheng kali hapdeng surok.
Haba ai jingkren sha ki paidbah, u Bah Ardent u la pynshai ba ha kine ki shiphew sngi ba u la shah thngan u khlem bam tuh namar lada u leh kumta un shah ai jingsneng ha u nongbuh nongthaw. Hynrei ha ka sngi kaba khyndai ki doktor ki la wan ban ai ‘drip’ ban lait na ka jingktah jong ka met namar ka jingshah thngan.
“Kane ka jingwan ai drip ïa nga, ka dei hadien ba nga la sngap ïa ka jingbatai ki doktor, ki la shim nongmuna ïa ka snam bad lap ba nga khlem bam eiei” u la ong.
U la ong ba kane kam pat dei ka jingjop, ka dei tang ka jingsdang ha ka jingïaleh namar ki dang don shibun ki mat kiba ka VPP kan mih shakhmat.
“Naduh ba nga long kum u President ka FKJGP nga ju ong ba lada ki nongmihkhmat kiba don ha ïingdorbar thawaiñ bad ha Secretariat ki don jingkitkhlieh ïa ka jaidbynriew, ym donkam ïa ki sengbhalang ban mih pyrthei” u la ong.
Shuh shuh u la pyntip ruh haba u leit pynshai sha ki paidbah, ki don kiba pynsngew ba kane ka bhah thung kam ka long kaba eh palat. Hynrei da ka jingkyrshan jong ki paidbah, ka sorkar ka la thung da ka Expert Committee ban sdang ban pynbeit thymmai ïa ka bhah thung kam.
