Shillong, Jylliew 01:
U President ka Voice of People Party (VPP), Bah Ardent Miller Basïawmoit bad uba long ruh u MLA ka Nongkrem, u la pynkut noh ïa ka jingshong shah thngan kaba la neh haduh shiphew sngi na bynta ka daw bah jong ka jaidbynriew; kata ban pynthymmai noh ïa ka Meghalaya State Reservation Policy kaba la 51 snem. Kane ka wan hadien ba ka Sorkar Jylla ha ka Sngi Palei ka la pynmih ïa ka byrta ba la thaw ïa ka Expert Committee na bynta ban khmih thymmai biang ïa ka Reservation Policy.
Kane ka kynti kan long ka jingsah kynmaw ha khana pateng ba namar ka jingïakhih kaba jai jai jong u Bah Ardent da kaba shah thngan 10 sngi lynter ka la pynlong ïa ka sorkar ban pyndem tdong bad ban rai thaw ïa ka Expert Committee halor ka Reservation Policy ne ka bhah thung kam thungjam jong ka Jylla.
Ka Sorkar Jylla ka la thaw mynta ka sngi ïa ka expert committee bad ïa kane la pynbna da u Chief Secretary ka Jylla, Bah D.P Wahlang lyngba ka tnat Personnel & A.R (B) ka Sorkar Jylla.
Kane ka komiti kan shong bishar thymmai ïa ka State Reservation Policy da kaba shim ïa ki jingai jingmut na baroh ki liang kiba don bynta bad ruh da kaba leit ïuhkjat sha baroh ki bynta jong ka Jylla.
U Bah Ardent haba ïoh pdiang ïa ka shithi ba la thaw ïa ka expert committee halor ka Reservation Policy, u la lum ïa ka jingïalang paidbah bad ban pynbna ba u la pynkut noh ïa ka jingshah thngan da ka jingduwai.
U la ong ruh ba ka sorkar ka dei ruh ban pynsangeh ïa ka jingthep kam tad haduh ba la pynbeit ïa ka Reservation Policy ka jylla.
U Bah Ardent u la ong, ka dei kane kaba ka VPP ka la dawa bad ka VPP ka la buh ïa kane ka mat ha ka mat ilekshon bad ka seng ka la buddien, katba kiwei pat kim sngewnud ban leh eiei.
U la pynpaw ka jingsngewnguh ïa ki nongïalam ka party kiba la leit mihkhmat sha ka komiti kiba la pynbor ïa ka sorkar ban thaw ïa ka Expert Commitee.
“Kumba nga la kular ïa phi ki paidbah, nga la pyndep ïa ka jingkular ba ngan ym mih na kane ka jaka katba ym pat mih ka notification da ka Sorkar,” u la ong.
U la ong ba ka sorkar kala kohnguh ba dei ban pynbeit thymmai ïa ka Reservation hynrei ka VPP kan nang buddien ba ka jingthungkam thungjam da ka sorkar kam dei shuh ban ïaid kynriang ha kaba tang ki briew kiba don jingithuh ne don jingïajan kin shah thungkam.
Kum ka dak jong ka jingpynkut noh ïa ka jingshong shah thngan kaba la neh haduh 10 sngi, u Bah Ardent u la bam ïa ka ja ar shamoit ba pyntian da ka kurim.
