Shillong, Jylliew 01:
U Myntri ka tnat Pule Puthi ka jylla, u Rakkam A Sangma, ha ka Sngi Palei u la ong ba ki khlieh jong kiba bun ki jaka pule hapoh ka jylla ki la kyrpad ïa ka tnat Pule Puthi ba kim pat long satia kiba la khreh na ka bynta ban pyntreikam ïa ka New Education Policy (NEP) 2020 ha kane ka academic session ba mynta.
Haba kren sha ki lad pathai khubor, u Myntri u la ong, “Ka sorkar ha kine ki artaïew ba la leit ka la pynlong haduh lai tylli ki jingïalang bad u Vice-Chancellor jong ka North Eastern Hill University (NEHU), bad ruh bad ki khlieh jong ki jaka pule bapher bapher jong ka jylla halor ka jingpyntreikam ïa ka New Education Policy (NEP) 2020, bad shem ba kane kan nym pat long satia ban lah ban pyntreikam naduh kane ka aïom pule.”
U Rakkam u la ong, ba u la dep ruh ban ïakynduh markhmat bad ïakren marwei marwei bad ki khlieh jong ki jaka pule ba kham paw hapoh ka jylla. Ïa kine ki jaka pule la bthah ba kin ai da ka jingthoh halor kane ka kam, katba hadien kata, ka sorkar kan sa pynbit pynbiang ïa ka kaiphod halor ban buh por ban pyntreikam noh ïa ka NEP.
“Lashai lane ha ka taïew ban wan, ki khlieh jong baroh ki jaka pule kin sa phah sha ngi ïa ka jingshem ne ki jingeh jong ki halor kane ka mat ban pyntreikam ïa ka NEP, bad halor kane, na ka liang jong ka Sorkar kan sa shim ïa ka rai kaba dei,” u la ong.
Haba kylli halor ki jingeh ba don ban pyntreikam ïa ka NEP, u Myntri u la ong ba ka jingpyrkhat jong ka policy ka long kaba ïar bha bad ka jingthmu baroh hi ka long ban kyntiew ïa ka pule puthi hapoh ka jylla bad ka ri hi baroh kawei.
“Haba ngin pyntreikam ïa ka NEP 2020, kin don ki course kiba thymmai kiba hap ban wanrah ha baroh ki jaka pule jong ka ri bad kan don ruh ka jingbei pisa kaba heh bha na ka bynta ki jingtei, ki nonghikai bad bun kiwei pat ki bynta ki ban hap peit. Kumta na ka liang jong ka jylla kam don ha kata ka kyrdan kaba biang ban pyntreikam mardor ïa kane ka policy,” la ong u Myntri.
