Shillong, Jylliew 01:
Ka Meghalaya High Court ka la bthah ïa ka sorkar jylla ba kan pyni ïa ki saiñdur ha kaba ïadei bad pynkhlaiñ ïa ka jingdon ka umbam umdih bad kumjuh ban pynkhlaiñ ïa ka jingdon ka um ha Umïam bad ha Mawphlang.
Kane ka jingbthah ha ka Sngi Palei ka la wan hadien ba u Bah Thomas Passah u la ujor da ka mukotduma halor ka jingbym biang ka jingsam um ha East Khasi Hills khamtam ha nongbah Shillong.
U Bah Passah u la kdew ba watla ki don ki skhim kum ka Jal Jeevan Mission (JJM) bad ka Meghalaya Water Harvesting Mission bad nalor ba ka jylla ka dei kaba ju ïoh bun u slap, kan ym don kano-kano ka daw balei ki nongshong shnong kin ym ïoh um lane balei kan don ka jingduna um ha kane ka thaiñ.
Ha kine ki por, ka sorkar ka khlem lah ban pynbiang ïa ka jingdonkam jong ki nongshong shnong ha kaba ïadei bad ka bording bad ka um, la ong ka High Court. Ka la ong ruh ba watla ka ïingbishar kam ju kham leit sha kine ki bynta, hynrei lada don ki nongshong shnong kiba ujor ba ka bording bad ka umbam kim biang, dei ban ïoh ïa ka jingbatai balei ka long kumta.
Namarkata, ka High Court ka la bthah ïa ka sorkar jylla ban pyni kiei ki saiñdur kiba na ka bynta mynta bad hadien ban pynduna ïa ki jingeh jong ki paidbah ha kaba ïadei bad ka um. Ka sorkar ka dei ban ai ïa ka kaiphod banyngkong halor kane ha ka 12 tarik Jylliew ynda la shong bishar biang.
