Shillong, Jylliew 01:
“Ka jingïadei jong ka sorkar bad ki ‘mafia’ bad ka jingpynïaid ïa ka jingtih bad jingkhaïi tuh ïa u dewïong ka long kaba shai, bad kam don jingartatien ba kito kiba don ha ki kyrdan bahalor ha ka sorkar ki dei kiba ïoh jingmyntoi na kine ki kam be-aiñ, bad dei ma ki kiba hap kitkhlieh ïa ka jingduhnong ba shyrkhei ha ka liang ka khajna jong ka jylla.”
Kane ka dei ka jingkynthoh jong ka Meghalaya High Court pyrshah ïa ka sorkar jylla ha ka Sngi Palei ha ka por ba ka la shong bishar ïa ka mukotduma ba la ai da uwei u nongshong shnong ba la tip kyrteng kum u Champer M. Sangma pyrshah ïa ka sorkar jylla bad kiwei pat. Ïa u Champer la mihkhmat da u muktiar jong u, u Advocate Sujeet Dey.
Ha kane ka sngi, ka High Court ka la thalaiñ ruh ïa ka sorkar jylla halor ka jingbym pyni naduh mynshwa ïa ki shithi ba la thoh da ki tnat treikam ka Sorkar Pdeng bad ka Myntri ka tnat Pla Tyngka ha kaba ïadei bad ka jingkhaïi ïa u dewïong sha Bangladesh. Kita ki shithi ki dei kiba ka sorkar jylla ka la ïoh naduh shwa ba ka High Court kan shong bishar halor ki mat ki jura kiba ïadei bad ka jingtih bad jingkhaïi be-aiñ ïa u dewïong.
“Ka long kaba lyngngoh ba watla ka sorkar jylla ka la sngewthuh ïa ka jingkyrpad ki tnat treikam ka Sorkar Pdeng, ka la leh sting haduh ba ka la ailad da ki phew hajar metric ton u dewïong ban ïoh jingbit na ka bynta ban khaïi shabar ri lyngba ki Land Customs Station kiba don ha jylla, khlem kumba ka paw, da tohkit bniah shwa naei uta u dewïong u la wan poi,” la ong ka High Court.
Na ka liang ka sorkar jylla, ha ka jingthoh ba ka la ai sha ka High Court, ka la pan map na ka ïingbishar ba ka khlem wanrah ïa ki shithi ba la ïoh na ki tnat ka Sorkar Pdeng bad na ka Myntri ka tnat Pla Tyngka naduh kham mynshwa. Ka la ong ruh ba lada jin ka la wanrah ïa kine ki shithi, ki jingkynthoh jong ka High Court ha ka 17 tarik Jymmang, 2023 ba ka don ka jingïadonkti ka sorkar bad ki nongtih bad nongkhaïi be-aiñ ïa u dewïong kan ym mih satia.
Hynrei ka High Court ka la kdew pat ba ka jingbishar halor ka jingtih dewïong be-aiñ ka la sdang ha u Lber 2022, bad halor ka jingkhaïi dewïong be-aiñ, ka ïingbishar ka la sdang ban pynmih ïa ki hukum naduh u Ïaïong 2022.
“Lada ka sorkar jylla ka la shah maham ha ki tnat treikam ka Sorkar Pdeng ban pynthikna ba u dewïong ba la tih be-aiñ na kane ka jylla um dei ban ïoh lad ban shah khaïi shabar halor ka nongrim ba u dei u dewïong ba la tih na sha kiwei ki jylla, ka sorkar ka la dei ban shimkhia ban peit man la kawei pa kawei ka trok kaba kit dewïong, bad ban peit bniah ïa baroh kiba pan jingbit ban khaïi shabar ri naei ki ïoh ïa u dewïong,” la ong ka High Court.
Shuh shuh ka la ong ba na ka por sha ka por, la dep pynpaw ba kan ym don ka jingtih dewïong be-aiñ lada kam don ka jingkit ïa une u marpoh khyndew. Lada kam don ka jingkit dewïong, kan ym don ka jingdawa ïa une u marpoh khyndew, bad ka jingtih kan shu kut hi noh kumto.
