Imphal, Jylliew:
Ha ka sngi kaba lai jong ka jingleit jong u Myntri ka tnat Korbar Ri jong ka Sorkar Pdeng – Amit Shah sha Manipur, utei Myntri u la leit ban jngoh ïa ka thaiñ Moreh bad Kangpokpi bad u la ïakren bad ki kynhun na ka imlang sahlang. U la ïakynduh ïa ka kynhun jong ka Hill Tribal Council, Kuki Students Organisation, Kuki Chiefs Association, Tamil Sangam, Gorkha Samaj bad Manipuri Muslim Council ha Moreh. Ki dkhot ki la pynsngew ka jingkyrshan jong ki ïa ki sienjam jong ka Sorkar ban wanrah biang ïa ka jingjai-jai ha ka jylla.
Ha Kangpokpi, u Myntri ka tnat kam pohïing, u la ïakynduh ïa ki kynhun na ka imlang sahlang kum ka Committee on Tribal Unity, KukiInpi Manipur, Kuki Student Organisation, ThadouInpi, ki ‘riew pawkhmat bad ki ‘riew shemphang. U Myntri u la kular ban pynthikna ka jingpynpoi ïa ki mar ba donkam ha ki thaiñ rilum bad ki helicopter na ka bynta ki jingdonkam kyrkieh ha Churachandpur, Moreh bad Kangpokpi.
U Myntri u la leit ruh sha ka ktem lanot ha Kangpokpi bad u la ïakynduh ïa ki paid Kuki. U Amit Shah u la ong ba ngi ieng skhem ban wanrah biang ïa ka jingjai-jai ha Manipur bad ka jinglah jong ki ban leit phai sha ki ïing jong ki.
Hadien kane, u Amit Shah u la leit jngoh ïa ka ktem lanot kaba don ha Imphal ha kaba u la ïakynduh ïa ki jaitbynriew Meitei, u Myntri u la ong ba ka jingpeit bniah jong ngi ka dei ban ïalam biang ïa ka Manipur sha ka shong suk shong saiñ bad ka jinglah jong ki ban leit phai sha ki ïing jong ki.
U Myntri u la pynlong ruh ïa ka jingïalang bad ki ophisar ha Imphal halor ka jingshngaiñ bad u la ong ïa ki ba kin shim ïa ki sienjam kiba skhem ban tehlakam ïa ka jingiaumsnam, pyrshah ïa ki nongkieng atiar bad ba kin pynïoh biang ïa ki tiar ïaleh ba la shah knieh bad wanrah biang ïa ka jingjai-jai.
