Nongstoiñ, Jylliew 01:
Wat la ki kynhun seng bapher bapher na West Khasi Hills District ba kynthup ïa ka Hynñiewtrep Achick National Movement, Meghalaya Youth Federation, West Khasi Hill Student Union, Western Youth Federation bad UHM ki la ai por shitaïew ïa ka sorkar Jylla lyngba ka tnat ba dei peit ba ban ai ka jingpynshai halor ki tiar ba la rah noh na ka MCH Hospital Nongstoiñ, hynrei ha ka sngi Palei, kine ki kynhun ha ryngkat ki longkmie ki la hap ban hiar kyndit-kynsan sha MCH Hospital Nongstoiñ hadien ba ki la ïoh jingtip ba ka la don biang ka jingthmu ban kit ïa ki tiar ki tar na katei ka jaka sumar.
Nangta kitei ki kynhun seng ha ryngkat ki longkmie hadien ba ki la poi ha katei jaka sumar, ki la lap ïa kawei ka trok kaba la ïeng biang ha phyllaw jong katei ka jaka sumar da ka jingthmu ban kit ïa ki tiar na katei ka jaka. Kumta na ka liang jong ki, ki la pynsangeh noh ïa ka jingthep bad kit ïa ki tiar bad ki la phah thep biang ruh shapoh jong katei ka jaka sumar.
Ha katei ka sngi, ki kynhun seng da ka jingbitar ki la khang tala ruh ïa ka jaka buh ïa kitei ki tiar ha katei ka jaka sumar.
U samla D Sun, President ka WKHSU u la ong ba kum ki kynhun seng ki pynpaw ka jingsngewsih ha kaba ki la lap biang ïa ka trok kaba dang thmu ban wan kit ïa ki tiar ki tar na MCH Hospital Nongstoiñ.
“Ngi pynpaw ka jingsngewkhia ha kaba ïadei bad kane namar ha ka jingshisha ngi la dep ban ai por shitaïew ban pan jingshai ïa ka jingpynkynriah ïa ki tiar ha kaba ha ka jingsngewthuh la mang kyrpang na ka bynta ka MCH Hospital Nongstoiñ na ka bynta ka jingdonkam jong ki longkmie kiba kha khyllung ha kane ka district,” u la ong.
Shuh shuh u la ong ruh ba ka jingwan kit noh ïa kine ki tiar kala long kumba ibeiñ ïa ki para doh para snam jong ka West Khasi Hills kyrpang ïa ki longkmie, kumta yn nym ailad da lei lei.
Na ka liang ki kynhun seng ki dawa ïa ka sorkar bad ka tnat ba dei peit ba ka dei ban ai ïa ka jingthoh kaba shai ba balei la pynkynriah noh ha kaba kane ka hospital naduh u 2018 la pyndep bad 2019 ïa kitei ki tiar la wanrah. Ha ka jingshisha kim dei ban aidaw ïa kane ïa katai namar katei ka hospital ka dei kaba la rim ha district kaba long kum ka kmie haba ïa nujor bad ka South West Khasi Hills.
“Ngim lah ban tip ïa kata ka skhim kaba thymmai, hynrei ïa kaei kaba sorkar ka la mang na ka bynta ka MCH Hospital Nongstoiñ kan dei jong ka, bad ngim sngewtynnad ba ïa ki tiar na kane ka Hospital yn kit noh shawei,” la ong ka Kong A Kharsyniew, kaba dei kawei na ki longkmie na ka thaiñ Nongstoiñ bad bynrap ba lada ka sorkar bad ki bor ba dei peit ki leh da ka bor ban kit ïa ki tiar, ma ki ruh kim banse ban shim ïa ka bor wat ban khang tala shuwa ïa katei ka jaka sumar.
U Bah Hamar Lyngkhoi, President ka MYF u la ong ba ka khubor kaba shai sha ka sorkar ka long ba pynphai biang ïa ki tiar kiba la dep ban kit na ka MCH Hospital Nongstoiñ.
Ha katei ka sngi namar ka jingkhang jong ki kynhun seng, na ka liang ka DMHO West Khasi Hills ka Dr. S.A Lyngdoh ka la hap ban pynsangeh noh shuwa ïa katei ka jingkit.
Ka Dr. SA Lyngdoh, DMHO West Khasi Hills haba kren bad ki nongthoh khubor ka ong ba jingpynkit ïa ki tiar ka dei hi ka jingïoh ïa ka hukum na ki bor ba halor jong ka tnat ba dei peit. Ka la ïathuh ruh ba kitei ki tiar ki dei hi jong ka MCH Nongstoiñ, hynrei namar bym pat don ki nongtrei bad kam pat plie, kumta lehse ki sa pynmih ïa katei ka hukum.
Shuh shuh ka la ong ruh ba namar ka jingwan khang jong ki kynhun seng ban kit ïa ki tiar, kumta kan hap ban pynsangeh shuwa ban kit ïa ki tiar ban kan sa pyntip sha ki bor ba halor.
