Shillong, Jylliew 01:
U Co-Chairman ka Meghalaya State Development Reform Commission (SDRC), u Bah Process T Sawkmie, u la lum ïa ka jingïalang bad ki karikor ka tnat PHE, kumjuh ruh ïa ka executive committee jong ka Dorbar Shnong Mawïong Umjapung hapoh ka jingïalam jong u Rangbah Shnong Bah Herman Dohtdong ban ïakren halor ka skhim sam um kaba T.24 klur tam kaba u la pynïoh naduh ka por ba u long MLA ka Mawlai ha committee hall jong ka Secretariat, Shillong ha ka Sngi Ba-ar ka 30 tarik u Jymmang.
“Nyngkong eh ha kane ka sngi ngi la ïakren shaphang ka jingkyrduh um ha Mawïong Umjapung namarba mynshem snem ka tnat PHE ka la dep mang T.24 klur tam na ka bynta ban pyntreikam ïa ka jingsam um hapoh Mawïong Umjapung,” la ong u Bah Process, uba dei ruh u MLA barim ka Mawlai haba kren sha ki nongthoh khubor hadien ba la wai ka jingïalang.
U la ong, “Kaei kaba nga sngewsih ka long ba khlem lah ban pyntreikam ïa kane ka 24 klur tam. Kumta mynta ka sngi hadien ba la shimti kum u Co Chairman ka SDRC, nga la lum ïa kane ka jingïalang ïa ka executive committee jong ka Dorbar Shnong Mawïong Umjapung ryngkat ki heh engineer ka PHE ban ïa pyrkhat ïa kane bad haba ïa phylliew jingmut la sngewthuh ba kane ka 24 klur hi ka dang don. Kumta nga kwah ba na ka liang ka PHE kan pyntreikam noh ïa ka, kumjuh ruh na ka liang ka dorbar shnong Mawïong Umjapung kan pyrkhat bha bad kin pdiang sngewbha ïa kane ka skhim khnang ban lah ban weng ïa ka jingeh ki paidbah.
“Kumba ka long mynta hi ki paidbah ka Mawïong Umjapung ki jynjar bha, namarba na ka por sha ka por ki pump ki la duh bad sniew. Kumta na ka liang ka tnat PHE ka la mang ïa ka skhim kaba thymmai ban thied haduh saw tylli ki pump thymmai. Te nga ngeit skhem hadien ba la pyntreikam ïa kane ka skhim, ngi don jingkyrmen ba ki pump kin ym pynthut shuh,” la ong u Co Chairman.
U ong ruh, “Nga khmih lynti ynda la pyntreikam ïa kane ka skhim ki paidbah Mawïong Umjapung kin sa biang ïa ka umbam umdih.”
U pynpaw shuh shuh ba ha ka bynta kaba ar u la buddien ïa ki skhim Jal Jeevan Mission jong ki shnong Mawkynroh Umshing, Mawtawar, Umsaw Mawjynrong, Mawsiatkhnam, Umrynjah bad Umphrew.
Nangta u la kyntu ruh ïa ka tnat PHE ba kan shim khia lem ïa ka um sorkari, khnang ba ki paidbah kin ym mad jingeh.
Halor ka house connection ne jingring um ïing, u Bah Sawkmie u ïathuh ba ka bynta 3 ka dang ïaid shaid shaid bad u ngeit skhem ba shen kin sa ïoh ïa ka jingring um ïing kaba thymmai.
Ha kane ka jingïalang, na ka liang ka PHE la ïa don lang u Additional Chief Engineer, Bah RS Nongbri, ki executive engineer bad ki engineer na ka Greater Shillong Water Supply, ka Electrical bad kiwei ki division.
