Aizawl, Jylliew:
Ki bor sorkar jong ka jylla Mizoram ha kane ka taiew kaba mynta ki la pyntip ba ka Sorkar Jylla ka la kyrpad na ka Sorkar Pdeng ba kan pynbiang ïa ka lad jingïarap kaba T.5 klur na ka bynta ban pynbiang ïa ki lad jingïarap ïa ki paid Manipur kiba la wan ban rieh bad shong tngen hapoh u pud u sam jong ka jylla hadien ka jingmih jong ki jingïakajia bad jingïaumsnam ba shyrkhei kiba la jia ha Manipur naduh ka 3 tarik u Jymmang, 2023.
U Home Commissioner & Secretary jong ka Sorkar Mizoram, u H Lalengmawia ha ka jingïakren bad ki lad pathai khubor u la pyntip ba ka tnat kam pohïng jong ka sorkar jylla ka la kyrpad na ka Sorkar Pdeng ba kan pynbiang ïa ka lad jingïarap pisa na ka bynta ban pynbiang ïa ki lad jingïarap ïa ki pad Manipur kiba la wan ban rieh tngen ha Mizoram. U la ïathuh ruh ba na ka liang ka tnat kam pohïng jong ka jylla ka la dep ban phah da ka shithi sha ka Ministry jong ka tnat Korbar Ri ha ka taiew kaba la dep.
Kat kum ka jingïathuh jong u Lalengmawia, u la pyntip ba tad haduh ka sngi ba-ar jong kane ka taiew ba mynta, ki la don haduh kumba 8,532 ngut ki nong Manipur kiba la wan ban rieh tngen ha ka jylla Mizoram. U la pyntip shuh shuh ba ïa kitei ki nong Manipur la pynbiang ïa ki jaka sah jaka dem bad ïa ka bam ka dih da ka sorkar jylla, ki seng trei mon sngewbha, ki kynhun balang bad ki bor pynïaid shnong.
U la pyntip shuh shuh ba tad haduh kane ka kynti ba mynta, ka sorkar jylla kam pat shym la ïoh mad satia ïa ki jingeh kiba jwat ha kaba ïadei bad ka jingpynbiang ïa ki jaka shong jaka sahm bad ïa ka bam ka dih na ka bynta ki paid Manipur. Hynrei u la pyntip pat ba ka sorkar jylla kan sa lah ban ïakynduh ïa ki jingeh kiba jwat ha ki sngi ki ban sa wan namar ka jylla ka la dep ban pdiang lypa ïa palat 35,000 ngut ki nong Myanmar bad nong Bangladesh kiba la wan ban rieh tngen ha jylla.
U la pyntip ba ki la don haduh kumba 34,000 ngut ki nong Myanmar bad kumba 1,000 ngut ki nong Bangladesh kiba la wan ban rieh tngen ha ki shnong bad ki thaiñ bapher bapher jong ka jylla Mizoram.
U Lalengmawia u la pyntip shuh shuh ba tad haduh kane ka kynti kaba mynta, kam pat don satia kano kano ka jingphah kyrwoh na ka liang ka sorkar Manipur halor ka mat kaba ïadei bad ka jingwan rieh tngen ki nongshnong shnong ka jylla Manipur ha Mizoram.
Kat kum ka kaiphod na ka tnat Kam Pohïing jogn ka Sorkar Jylla la pyntip ba haduh 3,022 ngut ki nongshong shnong ka jylla Manipur ki la leit ban rieh tngen sha ka thain khappud kaba don markhap bad ka jylla Assam (Kolasib district); katba 2,875 bad 2,252 ngut pat ki la leit ban rieh tngen sha ka thain Aizawl bad Saitual district. Ki 383 ngut kiba sah pat ki la leit ban rieh tngen ha ka thain Champhai, khawzawl, Hnahthiah, Serchhip, Mamit bad Lunglei district.
