Shillong, Jylliew 01:
Ki pulit jong ka Anti Narcotic Task Force (ANTF), East Jaiñtia Hills ha ka Sngi Palei ki la ïoh ban kem ïa uwei u nongkhaïi drok na Assam ha ryngkat ka jingïoh kurup bun u drok heroin.
Une u nongkhaïi drok uba la shah kem u dei uba la tip kyrteng u Abdul Aziz Barbhuiya na Hailakandi, Assam. La ïoh kem ïa u na ka kali kaba don ïa u nombar AS-24-D-2838 ha Tongseng kaba hap hapoh ka thanat Lumshnong.
Une u briew u la mih na Kalain da ka jingthmu ban hiar sha Guwahati, la ong u Superintendent of Police ka East Jaiñtia Hills u Jagpal Singh. Ha ka jingtalasi ïa ka kali, ki pulit ki la ïoh ban kurup ïa u drok (heroin) ba khia haduh 926.40 gram uba la song ha 74 tylli ki synduk sabon.
Ïa une u briew la pynrung case ha thanat Lumshnong hapoh ka kyndon NDPS Act bad ka jingtohkit mynta ka la ïaid shakhmat.
