Shillong, Jylliew 01:
Ka Selsella Sports Association ka la ïai bteng ban long kum ka kynhun kaba khlem pat shah rem ha ka Meghalaya State League 2023, hadien ba ka lah ban pynjem khnap ïa ka Atong Matgrik da 8-3 kol ha ka sngi Palei ha madan Chandmari kaba ha Tura.
Ha kane ka jingïalehkai jong ka Group-D, u Saldih Momin u la khur ïa ka hat-trick hadien ba u la ïoh ban thep ha ka minit kaba 31′, 33′ & 45’+2, u rangïalehkai shongben u Sillingston Sangma (85′, 90′) u la thep ar kol, katba ïa kiwei pat la thep da u Walseng Sangma’s (4′), Ramseng Sangma (22′) bad u Tengsu Sangma (82′).
Hynrei u Walsrang Ch Sangma (35′, 80′) u la ïoh ban pynphai kylla ar kol na ka bynta ka Atong Matgrik, katba ïa kawei pat la pynbud da u Silash G Momin (48′) ha shwa ba katei ka kynhun kan mad ïa ka jingshah rem.
Lyngba kane ka jingjop, ka Selsella (9 point) ka la jam sha ka kyrdan ba-ar bad duna 1 point ïa ka Khliehmawlieh, kaba dang bat ïa ka kyrdan ba hakhlieh ha ka Group-D.
Ha ka jingïakhun jong ka Group-B kaba la long ha Kiang Nangbah Stadium kaba ha Jowai, ka Mulait United ka la lah ban pynliem noh ïa ka Rymbai Ïawpynsing da 6-1 kol.
U Jas Chyrmang (19′, 49′, 66′) u la khur ïa ka hat-trick, katba ïa ki ar kol la thep da u Romarius Laban (63′, 64′) bad ïa kawei pat la thep da u Lency Swer (31′) na ka bynta ka Mulait, hynrei ka Rymbai ka la lah ban pynphai kylla shi kol lyngba u rangïalehkai shongben u Rimitre Lyngdoh (55′).
Lyngba kane ka jingjop kaba saw, ka Mulait ka la skhem ha ka kyrdan ba-ar da kaba kamai 12 point bad ka Rangdajied United ka la ïoh rung sha ka semi final na kane ka group.
Haba phai sha ka jingïakhun jong ka Group-A kaba la long ha ka nongbah Shillong, ka Umkseh ka la ïasam mar shi point ha ka jingïakhun pyrshah ïa ka Umrit hadien ba ïakhaid mar 2-2 kol.
Ha kane ka jingïakhun, u Daraplang Thangkhiew u la ïoh ban pynkhih jar nyngkong eh ha ka minit kaba 34 na ka bynta ka Umrit, hynrei ka Umkseh ka la pynïakhaid kylla lyngba u Rilangstar Umdor (60′).
Hashwa ban wai, ka Umrit ka la ïoh ban thep ïa ka kol kaba ar lyngba u Modesterson Matlai (80′), hynrei hadien hynriew minit u Rangkitbok Rani u la lah ban pynïakhaid kylla na ka bynta ka Umkseh.
Lyngba kane ka jingïakhun, baroh ar kine ki kynhun ki la kamai mar 5 point, ha kaba ka Umkseh ka la wan ha ka kyrdan balai bad ka Umrit ka la wan basaw hadien ba la tam lyngba ka ‘goal difference’ (-5 to -13).
