Paris, Jylliew:
U khlur ialehkai Tennis na Spain uba bat ia ka kyrdan ba nyngkong ha ka pyrthei u Carlos Alcaraz u la lah mynta ban pynurlong halade na ka bynta ban rung sha ka kylla ba 32 ha ka French Open ba mynta hadien ka jinglah ban pynliem noh ia u rang-iakhun pyrshah na Japan u Taro Daniel.
Kumta ha kaba iadei bad katei ka bynta,utei u rangialehkai na Spain da ka jingtrei shitom ka jong u, khatduh-iawai u la lah ban khur noh shalade ia ki 6-1, 3-6, 6-1, 6-2 jingjop bad hadien katei un pynkhreh pat sa na ka bynta ban iakynduh bad u nongialehkai na Canada u Denis Shapovalov uba lah pynliem noh ia u nongiakhun pyrshah na Italy u Matteo Arnaldi ha ki saw set iakhun. Kumba ka paw mynta ka long ba u Carlos Alcaraz u iakhun na ka bynta ban iai pyndap trophy jingjop shuh shuh kaba un khur na ka tei ka lympung ialehkai sha ka trophy jingjop kaba u lah dep ban khur na ka US Open 2022 bad katei ka jingjop ka ai ruh sha utei u rangialehkai ia ka sienjop kaba 22 na ki 24 ha ka jingshim bynta ka jong u ha kum katei ka lympung ialehkai ha madan khyndew-saw ha une u snem ba mynta; ha kaba ka jingiaid lynti ka jong u ha kum katei ka lympung ka lah sei ia u soh ha ka jinglah ban khur ia ka trophy jingjop na ka lympung ialehkai ha Buenos Aires, Madrid bad Barcelona.
Ha kawei pat ka jingiakhun jong ki shynrang, u Thanasi Kokkinakis u la lah ha ka ban pynwai noh ia ka jingiaid lynti jong u Stan Wawrinka ha ka tei ka lympung ialehkai ha ki san set iakhun ha ka jingiaknieh jaka jong ki sha ka kylla iakhun kaba lai bad ka sien kaba nyngkongeh ban khur jingjop naduh u snem 2015 na ka bynta u Thanasi da ka jinglah jong u ban khur noh shalade ia ki 3-6, 7-5, 6-3, 6-7 (4/7), 6-3.
Hadien katei ka jingjop, u Kokkinakis u lah ruh ban iakynduh bad u nongialehkai na Russia u Karen Khachanov ne bad u nongialehkai na Moldova u Radu Albot ha ka jing-iaknieh rung pat sa sha ka rynsan iakhun pre-quarterfinal.
Ha kaba iadei bad ka jingiakhun paramarwei jong ki kynthei, ka Aryna Sabalenka kaba bat ia ka kyrdan ba-ar ha ka pyrthei ka lah jam mynta sha ka kylla iakhun kaba lai ha ka lympung da ka jinglah ban khur jingjop ha baroh shilynter ki ‘set’ iakhun pyrshah ia ka nongialehkai na Belarus ka Iryna Shymanovich da 7-5, 6-2 victory bad hadien katei ka jingjop, ka Sabalenka kan sa iakynduh pat la kan long bad ka nongialehkai na Poland ka Magdalena Frech ne bad ka nongialehkai na Russia ka Kamilla Rakhimova.
