Oman, Jylliew:
Ka kynhun ialehkai Hockey Junior jong ki shynrang ka ri ka la lah ban ialehkai bha ha ka jingshimbynta ha ka lympung ialehkai ba mynta ka Junior Asia Cup ha kaba kata ka kynhun ka lah sei ia kata ka jingsynshar ba radbah ha ka jingiakhun baroh kawei na ka bynta ban pynliem noh ia ka kynhun ialehkai ba khlain jong ka South Korea da 9-1 kol. Kane ka jingialehkai ka dei ruh na ka bynta ban iaknieh rung sha ka phainal jong katei ka lympung ialehkai kaba long ha Oman.
Kumta ha ka jingiakhun phainal ka jong ka, katei ka kynhun ka lah ban iakynduh bad ka nongjop ha ka jing-iakhun semifinal ba-ar hapdeng ka Malaysia bad Pakistan. Haba phai pat ruh sha katei ka jingia aireng ka kynhun pyrshah ka Korea bad ka jinglah ban khur ia kitei ki khyndai kol, ka khubor ka iathuh ba u Dhami Boby Singh u lah plie ia ka lad ka lynti sha ka kynhun baroh kawei lyngba ki lai kol (hat-trick) ha kawei ka jingiakhun kaba u la lah ban khur bad ia kaba lah rai ruh ia u kum u ‘Player of the Match’ ha kaba kut jong ka jingialehkai.
Kumta ruh kita ki lai kol kiba u Dhami u lah ioh ban khur na ka jingiakhun baroh kawei ka long ha ka minit ialehkai ba 31, 39 bad 55 bad dei u Lakra Sunit uba lah plie ia ka jynkhang na ka bynta ka kynhun ialehkai ka ri ban kamai kol shuh shuh hadien ba u lah pynioh ia ka kol ba nyngkong ha ka 13min ialehkai bad ha ka 19min, u Hundal Araijeet Singh u lah iai byrtap shuh shuh sha ka kynhun da ka kol ba-ar ha shuwa ba u Dhami un ioh ban pyntreikam bha ia u dieng-tied jong u.
Nangta shuh shuh bud sa ka kol na u Angad Bir Singh bad Uttam Singh ha ka 34 bad 38min ialehkai na ka bynta ban pynlong ia ka kynhun ban tam kol shakhmat da 6-0 ha kaba kut jong ka quarter iakhun kaba lai. Ha kaba iadei bad ka shi kol ba ka Korea ka lah ioh ban thep, ka long lyngba u Keonyeol Hwang uba la lah ban pynioh sha ka kynhun baroh kawei ha ka 46 min ialehkai.
Hynrei ka kynhun India ka lah nang iai bteng ia ka jingpyniaid jong ka ha ka jingialehkai, da kaba khur kol shuh shuh sa ha ka 51min ialehkai lyngba u Vishnukant Singh na ka bynta ban kynjoh sha ka 7-1 kol bud sa kiwei pat ki ar kol na ka bynta ban pynlong ia ka kynhun baroh kawei ban khur ia kitei ki khydai kol ha kaba kut.
