Spain, Jylliew:
Ka long ka sien kaba ar ha kaba kawei na ki klob ialehkai phutbol ba pawnam bha na Spain ka Real Madrid, ka lah shah jied mynta kum kawei na ki klob ialehkai ba remdor tam ha ka pyrthei. Ka jinglah jong katei ka klob ban poi sha katei ka thong ka long da ka jinglah ban pynliem bad ban tam noh shakhmat ia ka klob ialehkai ba paw na London ka Manchester United.
Nangta ka khubor ka iathuh ruh ba katei ka klob ialehkai na Spain ka lah ioh ban kiew biang mynta sha katei ka kyrdan bahahakhliehduh ha ka thup na ka bynta u snem ba-ar da kaba long ka klob kaba remdor tam mynta d haduh USD 6.07 billion. Ka sien kaba khatduh ba katei ka klob ka lah bat ia ka kyrdan ka long ha u snem 2019.
Katkum ka khubor ba lah ioh lum lyngba ka website jong katei ka klob ka iathuh ba katei ka klob ka lah kynjoh mynta sha ka 19 % ka jingkiew jong ka ha ka jingremdor ka jong ka haba ianujor bad ka dor jong ka ha u snem ba lah dep.
Lyngba katei ka website lah pynpaw ruh ha kaba iadei bad ka ioh-ka-kot ba ka klob ka la lah ban pynmih kum u soh jong ka jingseisoh ka jong ka ha ka kam ialehkai, kata da kaba khur ia ki san tylli ki khusnam jingjop jong ki khyndai jingiakhun phainal jong ka ha ka lympung Champions League bad ruh ka jingiatehlok ha ka jingiasoi bad ka Sixth Street & Legends na ka bynta ka jingiai pynthymmai ia ka madan ialehkai jong ka klob ka Santiago Bernabeu.
Ha kata ka thup ba thymmai mynta jong ki klob ialehkai bapher bapher, ka klob Man United ka lah wan ba-ar ha ka jingremdor ka jong ka kaba lah kot sha ka USD 6 billion bad ha kaba katei ka kynhun ialehkai ka pynkhreh mynta na ka bynta ka jingiakhun phainal bad ka Manchester City ha ka lympung FA Cup.
Shuh shuh ruh sa kawei pat ka klob ialehkai na Spain ka Barcelona ka long ka kynhun ialehkai kaba lah khur mynta ia ka kyrdan balai ha katei ka thup ha ka jingremdor ka jong ka kaba lah kot mynta sha ka USD 5.51 billion bad ka long ruh ka kynhun ialehkai kaba lah rah ia ka trophy jingjop mynta u snem na ka lympung Spanish La Liga. Katba ka klob kaba lah wan ha ka kyrdan ba saw ka long ka Liverpool ha ka jingremdor ka jong kaba lah kot sha ka USD 5.29 billion.
Kumjuh ruh ka Liverpool ka lah pyndep ia ka jingiaid lynti jong ka ha ka kyrdan bas an jong ka lympung ialehkai EPL mynta u snem bad ka klob kaba lah wan ha ka kyrdan ba san ha ka jingremdor ka long ka lahduh ha ka EPL ka Manchester City da USD 4.99 billion.
Ka khubor ba lah ioh lum ka iathuh ruh ba ka klob ialehkai na ka lympung German Bundesliga kaba long ka lahduh ha ka lympung ka Bayern Munich, ka khur mynta ia ka kyrdan ba hynriew ha ka jingremdor ka jong ka kaba lah kot sha ka USD 4.86 billion.
Katba ka klob ialehkai ha ka lympung Ligue1 kaba long ruh ka lahduh ka Paris Saint-Germain ka wan ha ka kyrdan ba hynniew ha ka thup da USD 4.21 billion; katba ka klob ialehkai na Bilat ka Chelsea ka ioh ban bat mynta ia ka kyrdan ba phra ha ka jingremdor ka jong ka kaba lah kot mynta sha ka USD 3.1 billion bad sa kawei pat ka klob ialehkai na katei ka ri ka Tottenham Hotspur ka wan ha ka kyrdan ba khyndai ha ka jingremdor ka jong ka kaba lah kot sha ka USD 2.8 billion bad ka klob kaba khatduh ha katei ka thup ka long ka Arsenal da USD 2.26 billion.
