Bangkok, Jylliew:
Ka jingiaid lynti jong uwei na ki nongialehkai Badminton ka ri u Kiran George ha ka lympung ialehkai ba mynta ka Thailand Open Super 500 tournament ka lah nang iai bteng kum ka jingiaid lynti kaba seisoh bad ba jop, ha kaba utei u rangialehkai u lah jam mynta shaduh ka rynsan iakhun quarterfinal da ka jinglah ban pynliem noh ia u rangiakhun pyrshah na China u Weng Hong Yang ha baroh shi lynter jong ki jingialehkai.
Ka khubor ka iathuh ruh ba u Kiran u lah shimpor shiteng kyta tam na ka bynta ban pynliem noh ia utei u rangialehkai ba paw na China na ka bynta ban khur shalade ia ki 21-11, 21-19 ha ka jingiakhu paramawei ka jong ki ha ka rynsan iakhun pre-quarterfinal. Ka long ruh ka sien kaba nyngkong ba u Kiran u lah ioh ban rung sha ka quarterfinal ha ka BWF World Tour Super 500. Kumta ruh hadien katei ka jingjop, utei u rangialehkai ka ri uba long ruh u lahduh ha ka Odisha Open 2022 un iakynduh pat sa bad u nongjop na ka jingiakhun hapdeng u Ng Ka Long Angus na Hong Kong bad u Toma Junior Popov na France. Kumjuh ruh ka long ka jingkut noh ka jingiaid lynti jong ka Ashmita Chaliha ha katei ka lympung ialehkai hadien ba ka lah mad ia ka jingshah pynrem noh da 18-21 13-21 ha ka lahduh Olympic barim na Spain ka Carolina Marin.
Ka khubor ka iathuh ruh ba ka BWF World Tour la phiah ha ki hynriew tylli ki kyrdan; kata ka World Tour Finals, four Super 1000, six Super 750, seven Super 500 bad ka 11 Super 300. Kumta ka Super 500 ka dei ha ka Grade 2 ( kyrdan ba 4) ha ka BWF tournament Ranking System.
