Nongstoiñ, Jylliew 01:
Ki pulit ka thanat Nongstoiñ ha ka 31 tarik u Jymmang 2023 ki la kem noh ïa uwei u briew ïa uba la suba jur ba u la donkti ban leh be-ijot ïa uwei u khynnah na kawei na ki shnong ha West Khasi Hills.
Kat kum ka tyllong khubor ba la ïoh lum la ïathuh ba ka jingkem jong ki pulit ïa utei u briew ka dei hadien ba ki pulit ki la ïohpdiang ïa ka jingujor na kawei ka longkmie kaba la buhrieh kyrteng na kawei ka shnong hapoh West Khasi Hills halor ka jingshah leh be-ijot u khun jong ka ha uwei u briew.
Shuh shuh ka khubor na ki pulit ka la ong ruh ba utei u briew uba la shah kynnoh ban leh ïa katei ka kam pohjait dei uba la tip kyrteng kum u Mebanrilang Syiem Shangoi na kawei ka shnong kaba hap hapoh West Khasi Hills District.
Ka khubor ka ïathuh ruh ba katei ka jingjia ka la jia naduh u snem 2022, hynrei katei ka longkmie ba ujor ka dang tip myn ha ka 29 tarik u Jymmang hadien ba u khun jong ka, u la ïathuh ïa kaei kaba la jia ïa u.
Kumta na ka liang ki pulit ki la kem noh ïa utei suba nongleh be-ijot ha kaba la pynkit noh ïa u ban set along ha nongbah Shillong.
